அவசர நிலைகளுக்குத் தயாராகுங்கள் 

அவசர நிலைகளுக்குத் தயாராகுங்கள்:

3 நாட்களுக்கான உணவு, குடிநீரைச் சேமித்து வைக்குமாறு பிரித்தானிய மக்களுக்கு அரசாங்கம் அவசர அறிவுறுத்தல்!

தீவிர காலநிலை மாற்றங்கள், சைபர் தாக்குதல்கள் அல்லது ஏதேனும் பாரிய அவசர நிலைகளை எதிர்கொள்ளும் வகையில்,

ஒவ்வொருவரும் தலா ஒன்பது லீற்றர் குடிநீர் மற்றும் மூன்று நாட்களுக்குப் போதுமான உணவை வீடுகளில் சேமித்து வைக்குமாறு பிரித்தானிய அரசாங்கம் அந்நாட்டு மக்களுக்கு அவசர வழிகாட்டலை விடுத்துள்ளது.

காலநிலை நெருக்கடி, அதிகளவிலான தொழில்நுட்பத் தங்கியிருப்பு மற்றும் எதிரி நாடுகளின் அச்சுறுத்தல்கள் அதிகரித்து வரும் நிலையில்,

மக்கள் 72 மணிநேரத்திற்குத் தேவையான அத்தியாவசியப் பொருட்களைத் தயாராக வைத்திருப்பதை நோக்கமாகக் கொண்டு “Be Ready” (தயாராக இருங்கள்) என்ற விசேட பிரச்சாரத் திட்டத்தை அரசாங்கம் முன்னெடுத்துள்ளது.

வீடுகளில் சேமித்து வைக்க அறிவுறுத்தப்பட்டுள்ள அத்தியாவசியப் பொருட்கள்:

குடிநீர்: ஒரு நபருக்கு ஒரு நாளைக்குக் குடிப்பதற்காக மாத்திரம் 3 லீற்றர் வீதம், மூன்று நாட்களுக்கு 9 லீற்றர் போத்தல் குடிநீர் (சமையல் மற்றும் கழுவுவதற்கு மேலதிக நீர் தேவைப்படும்).

உணவு: மூன்று நாட்களுக்குப் போதுமான தகர அடைக்கப்பட்ட (Tinned food) மற்றும் நீண்ட நாள் கெடாத உலர் உணவுகள்.

அவசர தேவைக் கருவிகள்: முதலுதவிப் பெட்டி (First aid kit), மின்கலங்களுடன் கூடிய டோர்ச் லைட், கையால் சுற்றக்கூடிய (Wind-up) FM வானொலிப் பெட்டி.

ஏனையவை: பேரிடர் காலத் தேவைகளுக்காகப் போர்வைகள் மற்றும் கையில் ரொக்கப் பணம் (Cash) வைத்திருக்கவும் அறிவுறுத்தப்பட்டுள்ளது.

இது குறித்துப் பாதுகாப்பு அமைச்சர் டான் ஜார்விஸ் (Dan Jarvis) குறிப்பிடுகையில், “இந்த ஆலோசனையைப் பின்பற்றக்கூடிய அனைவரும் உடனடியாகப் பின்பற்ற வேண்டும்; இது ஒரு தேசமாக நமது தயார்நிலையை மேம்படுத்துவதற்கான எளிய நடைமுறை” எனத் தெரிவித்தார்.

பாதுகாப்புச் செயலாளர் வெஸ் ஸ்ட்ரீட்டிங் கருத்துத் தெரிவிக்கையில், ரஷ்யா உள்ளிட்ட எதிரி நாடுகள் பிரித்தானியாவின் உள்கட்டமைப்புகளை இலக்கு வைத்து நடத்தும் ‘

அரசு ஆதரவு பயங்கரவாத’ (State-sponsored terrorism) அச்சுறுத்தல்களையும் எதிர்கொள்ள நாடு தயாராக வேண்டும் என எச்சரித்தார். ”

இவை அனுமானங்கள் அல்ல, நிஜமான அச்சுறுத்தல்கள்; எனவே நமது தேசியப் பாதுகாப்பையும் தயார்நிலையையும் நாம் தீவிரமாகக் கையாள வேண்டும்” என்றும் அவர் சுட்டிக்காட்டினார்.

ஐரோப்பிய நாடுகளின் நடைமுறை மற்றும் காலநிலை அச்சுறுத்தல்:

மூன்று நாட்களுக்குத் தேவையான உணவு மற்றும் பொருட்களைச் சேமித்து வைக்கும் இந்த நடைமுறை பிரான்ஸ், அயர்லாந்து மற்றும் நெதர்லாந்து ஆகிய நாடுகளில் ஏற்கனவே நடைமுறையிலுள்ள நிலையில், தற்போது பிரித்தானியாவும் அதனைப் பின்பற்றத் தொடங்கியுள்ளது.

அண்மைய ஆண்டுகளில் பிரித்தானியாவைத் தாக்கிய கோரப் புயல்களைத் தொடர்ந்து, வரவிருக்கும் குளிர்காலப் புயல் காலத்திற்கு முன்னதாகவே இப்பிரச்சாரம் ஆரம்பிக்கப்பட்டுள்ளது.

கடந்த ஜனவரியில் மணிக்கு 100 மைல் வேகத்தில் வீசிய ‘கொரெட்டி’ (Storm Goretti) புயலால் பல்லாயிரக்கணக்கான வீடுகள் மின்சாரத்தை இழந்திருந்தன.

உலகளாவிய ரீதியில் ஏற்படக்கூடிய ‘சூப்பர் எல்-நினோ’ தாக்கம் காரணமாக, 2027 ஆம் ஆண்டு வரலாற்றிலேயே மிக வெப்பமான ஆண்டாக மாறக்கூடும் எனவும், அது உணவு மற்றும் எரிசக்தி விநியோகத்தைப் பாதிக்கலாம் எனவும் அச்சம் நிலவுகிறது.

உலகளவில் பல மில்லியன் இணையத்தளங்களில் பயன்படுத்தப்படும் PHP புரோகிராமிங் மொழியில் ஏற்பட்ட பாதுகாப்புக் குறைபாட்டை அடுத்து, முன்னெச்சரிக்கை நடவடிக்கையாகப் பிரித்தானிய அரசாங்கத்தின் 32 இணையத்தளங்கள் முடக்கப்பட்ட தருணத்திலேயே இந்த புதிய அவசர வழிகாட்டல் வெளியிடப்பட்டுள்ளமை குறிப்பிடத்தக்கது.

அரசின் அதிகாரப்பூர்வ அறிவிப்பைப் பார்க்க: GOV.UK – Be Ready அறிவிப்பு