பகுதியளவிலான பதற்றத்தைத் தணிக்க வளைகுடா நாடுகளுக்கு பிரித்தானியாவின் நவீன வான் பாதுகாப்பு அமைப்புகள் விரைவு!
ஈரானிய ஆதரவுப் படைகளின் தாக்குதல்களிலிருந்து பிராந்திய நட்பு நாடுகளைப் பாதுகாக்கும் நோக்கில், பிரித்தானியாவின் அதிநவீன பாதுகாப்புத் தளவாடங்களை வளைகுடா நாடுகளுக்கு அனுப்ப அந்நாட்டின் பாதுகாப்புச் செயலாளர் ஜான் ஹீலி (John Healey) தீர்மானித்துள்ளார்.
சவூதி அரேபியா, பஹ்ரைன் மற்றும் குவைத் ஆகிய நாடுகளுக்கு இந்த உயர்மட்ட தற்காப்பு அமைப்புகள் வழங்கப்படவுள்ளன.
“பிரித்தானியாவின் சிறந்தவை” (Britain’s Best) எனக் குறிப்பிடப்படும் இந்தத் திட்டத்தின் கீழ், நடுத்தர தூர வான் பாதுகாப்பு ஏவுகணை அமைப்பான ஸ்கை சேபர் (Sky Sabre) சவூதி அரேபியாவிற்கு அனுப்பப்படவுள்ளது.
அத்துடன், மார்ட்லெட் (Martlet) இடைமறிப்பு ஏவுகணைகள் மற்றும் ரேபிட் சென்ட்ரி (Rapid Sentry) போன்ற குறுகிய தூர வான் பாதுகாப்பு தளவாடங்கள் பஹ்ரைன் மற்றும் குவைத் நாடுகளின் பாதுகாப்புப் பணியில் ஈடுபடுத்தப்படும்.
இந்த அமைப்புகளை இயக்குவதற்கும், உள்ளூர் படைகளுக்குப் பயிற்சி அளிப்பதற்கும் பிரித்தானியப் படையினர் அங்கு நிலைநிறுத்தப்படவுள்ளனர்.
வளைகுடா நாடுகளின் எரிசக்தி உள்கட்டமைப்புகள் மற்றும் அமெரிக்கத் தளங்கள் மீது ஈரான் முன்னெடுத்த ட்ரோன் மற்றும் ஏவுகணைத் தாக்குதல்களைத் தொடர்ந்தே இந்த நடவடிக்கை எடுக்கப்பட்டுள்ளது. இதனை ஒரு “பாரிய பதற்ற நிலை” (Serious Escalation) என வருணித்துள்ள ஜான் ஹீலி, பிரித்தானியா ஒரு உறுதியான நட்பு நாடாகத் திகழும் எனத் தெரிவித்துள்ளார்.
இது ஆக்கிரமிப்பு நடவடிக்கையல்ல, மாறாக ஈரானின் ஆக்கிரமிப்பைத் தடுத்து நிறுத்துவதற்கான ஒரு “பாதுகாப்பு இராஜதந்திர” (Defence Diplomacy) உத்தி என பிரித்தானிய பாதுகாப்பு அமைச்சகம் தெளிவுபடுத்தியுள்ளது.
