அமெரிக்க – இஸ்ரேலிய ஆக்கிரமிப்பிற்கு மலேசியா கடும் எதிர்ப்பு! ஈரானின் இறையாண்மைக்கு ஆதரவு
ஈரான் மீதான அமெரிக்க மற்றும் இஸ்ரேலியப் படைகளின் கூட்டு இராணுவ நடவடிக்கைகளுக்கு மலேசியா தனது கடும் எதிர்ப்பைப் பதிவு செய்துள்ளது.
மலேசிய வெளியுறவு அமைச்சருடன் நடைபெற்ற முக்கிய ஆலோசனையின் போது, ஈரானின் நிலப்பரப்பு மற்றும் அதன் பிராந்திய ஒருமைப்பாட்டைப் பாதுகாப்பதற்கான முழு உரிமையை மலேசியா மீண்டும் உறுதிப்படுத்தியுள்ளதாக ஈரான் அரசு தெரிவித்துள்ளது.
ஆக்கிரமிப்பு நடவடிக்கைகளை உடனடியாக நிறுத்த வேண்டியதன் அவசியத்தையும் மலேசியா இதன்போது வலியுறுத்தியுள்ளது.
இந்தக் கலந்துரையாடலில், உலகளாவிய எரிசக்தி விநியோகப் பாதையான ஹார்முஸ் நீரிணையைச் (Strait of Hormuz) சுற்றியுள்ள பதற்றங்கள் குறித்து விரிவாக ஆராயப்பட்டது.
தற்போதைய போரை நிறுத்த மேற்கொள்ளப்பட வேண்டிய இராஜதந்திர முயற்சிகள் மற்றும் பிராந்திய நாடுகளின் நிலப்பரப்புகளைத் தாக்குதல்களுக்காகப் பயன்படுத்துவதைத் தடுக்க வேண்டியதன் அவசியம் குறித்து ஈரான் இதன்போது மலேசியத் தரப்பிடம் கோரிக்கை விடுத்துள்ளது.
வளைகுடா பிராந்தியத்தில் விரைவாக அமைதியை ஏற்படுத்த மலேசியா அழைப்பு விடுத்துள்ள அதேவேளை, இந்தத் தாக்குதல்களில் கொல்லப்பட்ட ஈரானியப் பொதுமக்களுக்காக மலேசிய வெளியுறவு அமைச்சர் தனது ஆழ்ந்த இரங்கலையும் தெரிவித்துக் கொண்டார்.
