ஈரான் போர்: உலகப் பொருளாதாரத்தில் யாருக்கு லாபம்? யாருக்குப் பின்னடைவு?

ஈரான் போர்: உலகப் பொருளாதாரத்தில் யாருக்கு லாபம்? யாருக்குப் பின்னடைவு?

ஈரான் மீது அமெரிக்கா மற்றும் இஸ்ரேல் வான்வழித் தாக்குதல்களைத் தொடங்கி இன்றுடன் 20 நாட்கள் நிறைவடைகின்றன. இந்த மோதலால் உலக எரிசக்தித் துறை பெரும் பாதிப்பைச் சந்தித்துள்ள நிலையில், சில நாடுகள் இதனால் பெரும் லாபத்தை ஈட்டுகின்றன, சில நாடுகள் கடுமையான பொருளாதார நெருக்கடியைச் சந்தித்து வருகின்றன.

கத்தாரில் உள்ள உலகின் மிகப்பெரிய எரிவாயு நிலையமான ராஸ் லாஃபன் மீது ஈரான் நடத்திய தாக்குதலால், சர்வதேசச் சந்தையில் எரிபொருள் விலை கிடுகிடுவென உயர்ந்துள்ளது. இந்தச் சூழலைத் தங்களுக்குச் சாதகமாகப் பயன்படுத்திக் கொள்ளும் நோர்வே மற்றும் கனடா போன்ற நாடுகள், தங்களது உற்பத்தித் திறனை அதிகரித்து அதிக லாபம் ஈட்டத் தொடங்கியுள்ளன.

ஆனால், இந்தப் போரின் மறைமுக வெற்றியாளராக ரஷ்யா உருவெடுத்துள்ளது. அரபு நாடுகளிடமிருந்து எரிபொருள் கிடைப்பதில் சிக்கல் ஏற்பட்டுள்ளதால், சீனா மற்றும் இந்தியா ஆகிய நாடுகள் இப்போது ரஷ்யாவை நோக்கித் திரும்பியுள்ளன. குறிப்பாக, இந்தியாவிற்கு ரஷ்யா விற்பனை செய்யும் கச்சா எண்ணெயின் அளவு ஏற்கனவே 50 சதவீதம் அதிகரித்துள்ளது குறிப்பிடத்தக்கது.

மறுபுறம், வளைகுடா நாடுகள் பெரும் பின்னடைவைச் சந்தித்து வருகின்றன. ஓர்முஸ் நீரிணை முடக்கப்பட்டதால் கத்தார் போன்ற நாடுகள் தங்களது இயற்கை எரிவாயு உற்பத்தியைத் தற்காலிகமாக நிறுத்தியுள்ளன. இதனால் மத்திய கிழக்கு நாடுகளிலிருந்து எரிபொருளை இறக்குமதி செய்யும் ஆசிய நாடுகள் பெரும் நெருக்கடியில் உள்ளன. இலங்கை ,பாகிஸ்தான், வங்கதேசம் மற்றும் வியட்நாம் போன்ற நாடுகள் இந்த எரிசக்தி தட்டுப்பாட்டைச் சமாளிக்க வாரத்திற்கு நான்கு நாள் வேலை, வீட்டிலிருந்தே பணிபுரிதல் மற்றும் மின்சாரக் கட்டுப்பாடு போன்ற அதிரடி நடவடிக்கைகளை எடுத்துள்ளன.

சீனா தன்னிடம் பல மாதங்களுக்குத் தேவையான எரிபொருளைச் சேமித்து வைத்துள்ளதாலும், ரஷ்யாவுடன் நெருங்கிய வணிகத் தொடர்பு இருப்பதாலும் தற்போதைக்கு அமைதியாக இருக்கிறது. அமெரிக்காவைப் பொறுத்தவரை, அந்த நாடு எரிசக்தித் துறையில் தன்னிறைவு பெற்றிருந்தாலும், உலகளாவிய விலை உயர்வால் அங்குள்ள மக்களின் அன்றாட வாழ்க்கைச் செலவு அதிகரித்துள்ளது. இது இன்னும் எட்டு மாதங்களில் அங்கு வரவிருக்கும் இடைக்காலத் தேர்தலில் பெரும் தாக்கத்தை ஏற்படுத்தும் என எதிர்பார்க்கப்படுகிறது. ஐரோப்பாவிலும் எரிபொருள் விலை உயர்வால் மக்கள் பாதிக்கப்பட்டுள்ள நிலையில், ஸ்பெயின் போன்ற நாடுகள் மக்களுக்கு உதவப் புதிய நிதித் திட்டங்களை அறிவித்துள்ளன.

ஒட்டுமொத்தமாகப் பார்க்கும்போது, ஒரு பக்கம் போர் பெரும் அழிவைத் தருகிறது , மறுபக்கம் அது உலகளாவிய எரிசக்திச் சந்தையின் அதிகார மையங்களை மாற்றியமைத்து வருகிறது.குறிப்பாக சொல்வதானால் போர் என்பது இலாப வேட்டைக்கான ஒரு முதலீடு . இது தன இன்றைய உலக ஒழுங்கு .