அமெரிக்கா – இஸ்ரேல் தாக்குதல்களால் ஈரான் போர் தீவிரம்

அமெரிக்கா – இஸ்ரேல் தாக்குதல்களால் ஈரான் போர் தீவிரம்;

9-ஆம் நாளில் எண்ணெய் நிலையங்கள் தாக்கப்பட்டதால் மத்திய கிழக்கில் பதற்றம் அதிகரிப்பு (அல் ஜசீரா)

பிப்ரவரி 28 அன்று தொடங்கிய இந்தப் போரில், இரு நாடுகளும் இரானின் முக்கிய இராணுவ மற்றும் அரச கட்டமைப்புகளை குறிவைத்து தொடர்ந்து பெரிய அளவிலான வான்தாக்குதல்களை நடத்தி வருகின்றன.

சமீபத்திய தாக்குதல்களில் முதன்முறையாக ஈரானின் எண்ணெய் சேமிப்பு நிலையங்கள் மற்றும் எண்ணெய் சுத்திகரிப்பு மையங்கள் தாக்கப்பட்டுள்ளன. தெஹ்ரான் நகரத்தின் வெளியே உள்ள ஷெஹ்ரான் (Shehran) எண்ணெய் களஞ்சியத்தில் பெரிய தீப்பற்றியதாக உள்ளூர் ஊடகங்கள் தெரிவித்துள்ளன. 

இந்த தாக்குதல்களுக்கு பதிலடி நடவடிக்கையாக ஈரான் மிசைல்கள் மற்றும் ட்ரோன்கள் மூலம் இஸ்ரேல் மற்றும் அமெரிக்கா தொடர்புடைய இலக்குகளை தாக்கி வருகிறது. குறிப்பாக குவைத், கத்தார், சவுதி அரேபியா மற்றும் ஐக்கிய அரபு அமீரகம் போன்ற வளைகுடா நாடுகளில் உள்ள அமெரிக்க இராணுவ தளங்கள் மற்றும் முக்கிய கட்டமைப்புகள் மீது தாக்குதல்கள் நடத்தப்பட்டதாக தகவல்கள் தெரிவிக்கின்றன. 

போர் தொடங்கியதிலிருந்து உயிரிழப்புகள் வேகமாக அதிகரித்துள்ளன. அறிக்கைகளின்படி ஈரானில் ஆயிரத்திற்கும் மேற்பட்டோர் உயிரிழந்துள்ளனர். லெபனானிலும் பல நூறு பேர் உயிரிழந்துள்ளதாக தகவல்கள் வெளியாகியுள்ளன. மேலும் அமெரிக்க இராணுவத்தினரிலும் சிலர் உயிரிழந்ததாக தெரிவிக்கப்பட்டுள்ளது. 

இஸ்ரேல் தனது தாக்குதல்களை இரானுக்கு மட்டுமின்றி லெபனானிலும் விரிவுபடுத்தியுள்ளது. பெய்ரூத் நகர மையத்தில் உள்ள ஒரு கட்டிடத்தில் நடத்தப்பட்ட தாக்குதலில் பலர் உயிரிழந்தனர். அந்த இடத்தில் இரானின் குத்ஸ் படையுடன் தொடர்புடைய அதிகாரிகள் இருந்ததாக இஸ்ரேல் கூறியுள்ளது. இந்த தாக்குதல்களின் காரணமாக லெபனானின் தெற்கு பகுதிகளில் இருந்து ஆயிரக்கணக்கான மக்கள் வெளியேறியுள்ளனர். 

இதற்கிடையில், இந்த போரின் ஆரம்பத்தில் நடந்த தாக்குதலில் இரானின் உச்சத் தலைவர் ஆயத்துல்லா அலி காமெனெய் உயிரிழந்ததாக கூறப்பட்டதால், புதிய உச்சத் தலைவரை தேர்வு செய்யும் செயல்முறை இரானில் நடைபெற்றது. அந்தத் தேர்வு முடிவடைந்ததாக இரானின் Assembly of Experts அறிவித்துள்ளது. 

போர் மத்திய கிழக்கு முழுவதும் பரவக்கூடிய அபாயம் இருப்பதாக பல நாடுகள் எச்சரிக்கை விடுத்துள்ளன. வளைகுடா நாடுகளில் ட்ரோன் மற்றும் மிசைல் தாக்குதல்கள் நடந்ததால் பாதுகாப்பு நடவடிக்கைகள் அதிகரிக்கப்பட்டுள்ளன. பஹ்ரைனில் குடிநீர் உப்பு நீக்கம் செய்யும் நிலையம் ட்ரோன் தாக்குதலில் சேதமடைந்ததாகவும் தகவல்கள் கூறுகின்றன. 

இந்த போரின் விளைவாக உலக பொருளாதாரத்திலும் அதிர்ச்சி ஏற்பட்டுள்ளது. உலகின் முக்கிய எண்ணெய் போக்குவரத்து பாதையாக இருக்கும் ஹோர்முஸ் நீரிணை பகுதியில் கப்பல் போக்குவரத்து குறைந்துள்ளது. அதனால் சர்வதேச சந்தையில் எண்ணெய் விலை ஒரு வாரத்தில் சுமார் 27 சதவீதம் வரை உயர்ந்துள்ளது. 

இதற்கிடையில் அமெரிக்க அதிபர் டொனால்ட் டிரம்ப், இரான் “முழுமையான சரணடைவு” செய்ய வேண்டும் என்றும், இந்த இராணுவ நடவடிக்கை இன்னும் சில வாரங்கள் தொடரக்கூடும் என்றும் தெரிவித்துள்ளார். அமெரிக்கா மற்றும் இஸ்ரேல் இரண்டும் இரானின் அணு திட்டங்களை முழுமையாக கட்டுப்படுத்தும் வரை நடவடிக்கைகள் நிறுத்தப்படாது எனவும் கூறப்பட்டுள்ளது.

இந்த போரின் அதிர்வுகள் பல உலக நாடுகளுக்கும் பொருளாதார ரீதியில் விசாலமாவது குறிப்பிடத்தக்கது.