பிரதமர் ஹரிணி அமரசூரிய இலக்கு வைக்கப்படுவது ஏன்? பின்னணியில் அரசியல் காரணங்கள் ?
6 ஆம் தரத்திற்கான புதிய சீர்திருத்த கல்வி தொகுதியில் (Education Module) சர்ச்சைக்குரிய இணையதள இணைப்பு ஒன்று இடம்பெற்றமை தொடர்பாக எழுந்த சர்ச்சையைத் தொடர்ந்து, பிரதமர் மற்றும் கல்வி அமைச்சர் ஹரிணி அமரசூரிய சமூக ஊடகங்களிலும், சில மத மற்றும் சமூகக் குழுக்களாலும் கடுமையாக விமர்சிக்கப்பட்டு வருகின்றார்.
சர்ச்சையின் பின்னணி:
பாடசாலை பாடநூல் ஒன்றில் சர்ச்சைக்குரிய வெளிவாரி இணையதள இணைப்பு சேர்க்கப்பட்டமை பொதுமக்களிடையே கவலையை ஏற்படுத்தியது. இது தொடர்பில் கல்வி அமைச்சு பதிலளிக்க வேண்டும் எனப் பல்வேறு தரப்பினர் கோரிக்கை விடுத்தனர். எனினும், இந்தத் தவறு திணைக்கள மட்டத்தில் இடம்பெற்றது என்றும், அதனைச் சரிசெய்வதற்கான நடவடிக்கைகள் ஏற்கனவே எடுக்கப்பட்டுள்ளதாகவும் அதிகாரிகள் தெரிவித்துள்ளனர்.
இந்தத் தவறுக்கு பிரதமர் நேரடியாகப் பொறுப்பல்ல என்ற போதிலும், அவர் மீது முன்னெடுக்கப்படும் தீவிரமான விமர்சனங்கள் அரசியல் உள்நோக்கம் கொண்டவை என ஆய்வாளர்கள் சுட்டிக்காட்டுகின்றனர்.
ஜனாதிபதி அநுர குமார திஸாநாயக்கவினால் ஹரிணி அமரசூரிய பிரதமராக நியமிக்கப்பட்டமை, தேசிய மக்கள் சக்தி (NPP) அரசாங்கத்தின் சர்வதேச நன்மதிப்பை வலுப்படுத்தியிருந்தது.
இடதுசாரி சார்பு அரசாங்கம் சர்வதேச ரீதியில் எதிர்ப்புகளைச் சந்திக்கும் என எதிர்பார்த்த எதிர்க்கட்சிகளுக்கு ஏமாற்றமளிக்கும் வகையில், பிரதமர் ஹரிணி சர்வதேச சமூகத்துடன் வெற்றிகரமான இராஜதந்திர உறவுகளைப் பேணி வருகின்றார் என அரசாங்க ஆதரவாளர்கள் கருதுகின்றனர்.
இந்தத் தவறுக்குக் காரணமானவர்களைக் கண்டறிய கல்வி அமைச்சு விசாரணைகளை ஆரம்பித்துள்ளதுடன், ஒழுக்காற்று நடவடிக்கைகள் எடுக்கப்படும் எனவும் உறுதியளித்துள்ளது. நிர்வாக ரீதியான தவறுகளுக்கும், திட்டமிட்ட அரசியல் தாக்குதல்களுக்கும் இடையிலான வேறுபாட்டை பொதுமக்கள் புரிந்துகொள்ள வேண்டும் என அரசாங்கத் தரப்பு கேட்டுக்கொண்டுள்ளது.
எனினும் பல்வேறு அமைப்புக்கள் பாடப் புத்தகமொன்றில் ஓரினச்சேர்க்கையாளருக்கான இணையத்தள இணைப்பொன்று குறிப்பிடப்பட்டதும், அதற்கு பொறுப்புக்கூறவேண்டிய பிரதமர் தேசிய கல்வி நிறுவக பணிப்பாளரை பதவி விலகுமாறு பிரதமர் கோரியிருந்ததையும் பற்றி தமது எதிர்ப்புக்களை வெளிப்படுத்தியுள்ளன
