போக்குவரத்து அமைச்சர் பிமல் ரத்நாயக்கவின் ரயில்வே துறை அதிகாரிகளுக்கு கடும் எச்சரிக்கை
ரயில்வே சேவைகளின் முறையான செயல்பாடு மற்றும் பராமரிப்பை உறுதி செய்யத் தவறிய அதிகாரிகள் தங்கள் பதவிகளை விட்டு விலகத் தயாராக இருக்க வேண்டும் என போக்குவரத்து அமைச்சர் பிமல் ரத்நாயக்க ரயில்வே திணைக்கள அதிகாரிகளுக்கு கடும் எச்சரிக்கை விடுத்துள்ளார்.
களுத்துறை மாவட்ட செயலகத்தில் நடைபெற்ற கலந்துரையாடல் ஒன்றில் கலந்துகொண்டு பேசிய அமைச்சர் ரத்நாயக்க, ரயில்களின் பெட்டிகளின் மோசமான நிலை குறித்து விமர்சித்தார். குறிப்பாக, காலிக்கும் கொழும்புக்கும் இடையே இயக்கப்படும் முக்கிய அலுவலக ரயில்களில், உடைந்த ஜன்னல்கள், இயங்காத விசிறிகள் மற்றும் சுகாதாரமற்ற கழிப்பறைகள் போன்ற பிரச்சனைகளை அவர் சுட்டிக்காட்டினார்.
அவர் மேலும் ஒரு சம்பவத்தைக் குறிப்பிட்டுப் பேசினார். தனது முதல் ரயில் பயணத்தின்போது பழுதடைந்த ஜன்னலில் மோதி ஒரு சிறுவன் தனது இரண்டு விரல்களை இழந்தான். “இந்த ரயில்கள் உழைக்கும் மக்களுக்காகவே உருவாக்கப்பட்டவை. இத்தகைய மோசமான சேவையை நாம் எவ்வாறு நியாயப்படுத்த முடியும்? ஒரு மாதத்திற்குள், கழிப்பறைகள், ஜன்னல்கள், விசிறிகள் உட்பட அனைத்து சீரமைப்புப் பணிகளும் நிறைவுபெற்றிருக்க வேண்டும். மேலும், மூன்று நாட்களுக்குள் நீங்கள் என்ன செய்யப் போகிறீர்கள் என்று எனக்கு ஒரு வாட்ஸ்அப் மெசேஜ் அனுப்பவும். உங்களால் ஒரு அடிப்படை சேவையை வழங்க முடியாவிட்டால், பதவியை விட்டு வெளியேறுங்கள். இதுவே எனது இறுதி எச்சரிக்கை. நான் உண்மையில் மிகவும் சலித்துவிட்டேன்,” என்று அவர் கூறினார்.
