கல்விச் சீர்திருத்தங்கள் குறித்து நாடாளுமன்ற உறுப்பினர்களுக்கு பிரதமர் விளக்கம்
இலங்கையில் முன்மொழியப்பட்டுள்ள புதிய கல்விச் சீர்திருத்தங்கள் குறித்து பிரதமர் கலாநிதி ஹரினி அமரசூரிய நாடாளுமன்ற உறுப்பினர்களுக்கு விளக்கமளித்துள்ளார்.
பிரதமரின் ஊடகப் பிரிவு வெளியிட்டுள்ள தகவலின்படி, நேற்று நடைபெற்ற இந்த விளக்கக் கூட்டத்தில், கல்விச் சீர்திருத்தங்களின் முக்கிய அம்சங்களான அவற்றின் இலக்குகள், வழிகாட்டும் கோட்பாடுகள், முக்கிய தூண்கள், பாடத்திட்ட மாற்றங்கள், செயலாக்க உத்திகள் மற்றும் ஆசிரியர் பயிற்சி உள்ளிட்டவை குறித்து நாடாளுமன்ற உறுப்பினர்களுக்கு விளக்கப்பட்டது.
கல்வி அமைச்சு, தேசிய கல்வி நிறுவனம் மற்றும் தேசிய கல்வி ஆணைக்குழு ஆகியவை இந்தச் சீர்திருத்தங்கள் எவ்வாறு செயல்படுத்தப்பட்டு கண்காணிக்கப்படும் என்பது குறித்து மேலும் தெளிவுபடுத்தின.
இந்தச் சீர்திருத்தங்களின் முதன்மை நோக்கம், 21 ஆம் நூற்றாண்டின் சவால்களை எதிர்கொள்ளவும், நிலையான தேசிய வளர்ச்சி மற்றும் அமைதிக்கு பங்களிக்கவும் திறமையான குடிமக்களை உருவாக்குவதே என்று ஊடகப் பிரிவு தெரிவித்துள்ளது.
விளக்கக் கூட்டத்தைத் தொடர்ந்து, நாடாளுமன்ற உறுப்பினர்கள் சீர்திருத்தங்கள் குறித்த தங்கள் கருத்துக்களையும் பரிந்துரைகளையும் பகிர்ந்து கொண்டனர். சிறப்புத் தேவையுடைய மற்றும் மாற்றுத்திறனாளி குழந்தைகளுக்கான உள்ளடக்கிய கல்வியை உறுதி செய்வதன் முக்கியத்துவத்திற்கும் இதில் சிறப்பு கவனம் செலுத்தப்பட்டது.
