சிறுவன் Émile-இன் தாத்தா பாட்டி வீட்டிற்குத் தீ வைக்க முயற்சி: 78 வயது முதியவர் அதிரடிக் கைது!
Haut-Vernet (Alpes-de-Haute-Provence) பகுதியில் அமைந்துள்ள, சிறுவன் Émile Soleil-இன் தாத்தா பாட்டிக்குச் சொந்தமான வீட்டிற்குத் தீ வைக்க முயன்ற குற்றச்சாட்டின் பேரில் சனிக்கிழமையன்று நபர் ஒருவர் காவல்துறையினரால் கைது செய்யப்பட்டுள்ளார். கடந்த 2023 ஜூலை மாதம் அந்தச் சிறுவன் மாயமான அதே பகுதியில்தான் இந்த அதிர்ச்சியூட்டும் சம்பவமும் அரங்கேறியுள்ளது.
இன்று சனிக்கிழமை (மே 16) அதிகாலை, சிறுவனின் தாத்தா பாட்டியான Philippe மற்றும் Anne Vedovini ஆகியோரின் வீட்டைத் தீக்கிரையாக்க முயன்ற 78 வயது முதியவர் ஒருவர் காவல் காவலில் (Garde à vue) வைக்கப்பட்டுள்ளார்.
Digne-les-Bains அரசு வழக்கறிஞர் இது குறித்துத் தெரிவிக்கையில், “வீட்டின் பல இடங்களில் தனித்தனியாகத் தீ வைக்கப்பட்டதற்கான தடயங்கள் கண்டறியப்பட்டன. எனினும், தீயணைப்பு வீரர்களின் விரைவான நடவடிக்கையால் தீ உடனுக்குடன் கட்டுக்குள் கொண்டுவரப்பட்டது” என்றார். அதிர்ஷ்டவசமாக இதனால் பெரும் பொருட்சேதமோ அல்லது உயிர்ச்சேதமோ ஏற்படவில்லை. ஆபத்தான முறையில் பொருட்சேதம் விளைவித்த குற்றத்திற்காகக் காவல்துறையினர் (Gendarmerie) வழக்குப் பதிவு செய்து விசாரணையைத் தொடங்கியுள்ளனர்.
சிறுவனின் பாட்டி தரப்பு வழக்கறிஞரான Julien Pinelli, “கைது செய்யப்பட்ட நபரின் நோக்கம் என்ன என்பதை அறியக் காத்திருக்கிறோம்” என்று தெரிவித்தார்.
வேலை முடிந்து நள்ளிரவில் வீடு திரும்பிய ஒரு இளம் கிராமவாசி அளித்த தகவலின் பேரிலேயே மீட்புப் படையினர் விரைந்து செயல்பட்டதாகக் காவல்துறையினர் அறிக்கையில் தெரிவித்துள்ளனர்.
சம்பவத்தின்போது அந்த வீட்டில் யாரும் இருக்கவில்லை.
நிகழ்விடத்தில் எரிபொருள் (பெட்ரோல்) வாடை மிகக் கடுமையாக வீசியதால், இது திட்டமிட்ட சதிச்செயல் என்பதை அதிகாரிகள் உறுதி செய்தனர்.
விசாரணையில், முந்தைய நாள் அதே கிராமத்தில் உள்ள ஒரு தங்கும் விடுதியில் அறையை முன்பதிவு செய்த 78 வயது முதியவர் ஒருவரைக் காவல்துறையினர் விரைவாகக் கண்டறிந்தனர். அந்த நபர் Vedovini குடும்பத்தினர் வசிக்கும் இடம் குறித்து விசாரித்ததும் தெரியவந்தது. இதனையடுத்து, காலை 6 மணிக்கு அவர் தங்கியிருந்த விடுதியிலேயே வைத்து எவ்வித எதிர்ப்பும் இன்றி அவர் கைது செய்யப்பட்டார். கைது செய்யப்படும்போதும் அவரிடமிருந்து பெட்ரோல் வாடை வீசியதாக அதிகாரிகள் குறிப்பிட்டுள்ளனர்.
சிறுவன் Émile வழக்கு: மறக்க முடியாத பின்னணி
Le Vernet என்ற இதே குக்கிராமத்தில்தான் (Haut-Vernet) கடந்த ஜூலை 2023-இல் சிறுவன் Émile மர்மமான முறையில் மாயமானான். சுமார் ஒன்பது மாதங்களுக்குப் பிறகு, அங்கிருந்து 1.7 கிலோமீட்டர் தொலைவில் நடந்து சென்ற ஒருவரால் அவனது மண்டையோடு கண்டெடுக்கப்பட்டது பிரான்ஸ் முழுவதும் பெரும் அதிர்வலையை ஏற்படுத்தியது.
முன்னதாக 2025-ஆம் ஆண்டில், “திட்டமிட்ட கொலை” மற்றும் “உடலை மறைத்தமை” ஆகிய சந்தேகங்களின் பேரில் சிறுவனின் தாத்தா, பாட்டி மற்றும் அவர்களின் வயதுவந்த இரு பிள்ளைகள் காவல் காவலில் விசாரிக்கப்பட்டு, பின்னர் போதிய ஆதாரங்கள் இல்லாததால் விடுவிக்கப்பட்டனர்.
தற்போது இந்த வழக்கின் விசாரணையைத் தீவிரப்படுத்தும் வகையில், 2026-ஆம் ஆண்டின் தொடக்கத்தில் Haut-Vernet மற்றும் அதன் சுற்றுப்புறங்களில் வசிக்கும் மக்களிடம் 106 பேரின் மரபணு (DNA) மாதிரிகளைச் சேகரித்துப் புலனாய்வாளர்கள் ஆய்வு செய்து வருகின்றனர்.
இந்தச் சூழலில், சிறுவனின் குடும்பத்தார் வசிக்கும் வீட்டின் மீது நடத்தப்பட்டுள்ள இந்தத் தாக்குதல் முயற்சி, இவ்வழக்கில் மேலும் பல கேள்விகளையும் மர்மங்களையும் எழுப்பியுள்ளது.
