இந்தியா – அமெரிக்கா வர்த்தக ஒப்பந்தம்: ரஷ்ய எண்ணெய் இறக்குமதி குறைகிறது!
ரஷ்யாவிடமிருந்து இந்தியா வாங்கும் கச்சா எண்ணெய் அளவை இந்தியா குறைக்கத் தொடங்கியுள்ளதாக அமெரிக்க வர்த்தகப் பிரதிநிதி ஜேமீசன் கிரீர் (Jamieson Greer) தெரிவித்துள்ளார். சமீபத்தில் அமெரிக்க அதிபர் டொனால்ட் ட்ரம்ப் மற்றும் இந்தியப் பிரதமர் நரேந்திர மோடி ஆகியோருக்கு இடையே எட்டப்பட்ட வரலாற்றுச் சிறப்புமிக்க வர்த்தக உடன்படிக்கையைத் தொடர்ந்து இந்த மாற்றம் நிகழ்ந்து வருகிறது.
📌 இந்தியப் பொருட்களுக்கு விதிக்கப்பட்டிருந்த 25% கூடுதல் வரியை அமெரிக்கா நீக்கியுள்ளது. இதற்குப் பதிலாக, ரஷ்ய எண்ணெய்க்குப் பதில் அமெரிக்கா மற்றும் பிற நாடுகளிடமிருந்து எரிசக்தி ஆதாரங்களை இந்தியா பெறத் தொடங்கியுள்ளது.
2024-25 காலப்பகுதியில் ஒரு நாளைக்கு சுமார் 20 லட்சம் பேரல்களாக இருந்த ரஷ்ய எண்ணெய் இறக்குமதி, தற்போது 11-12 லட்சம் பேரல்களாகக் குறைந்துள்ளதாகவும், இது விரைவில் பாதியாகக் குறைய வாய்ப்புள்ளதாகவும் தரவுகள் தெரிவிக்கின்றன.
அடுத்த 5 ஆண்டுகளில் அமெரிக்காவிடமிருந்து சுமார் $500 பில்லியன் மதிப்பிலான எரிசக்தி, தொழில்நுட்பம் மற்றும் விமானப் பாகங்களை வாங்க இந்தியா ஒப்புக்கொண்டுள்ளது.
இந்தியாவின் இந்த முடிவு நாட்டின் எரிசக்தி பாதுகாப்பை உறுதி செய்வதோடு, சர்வதேச அளவில் அமெரிக்காவுடனான உறவை மேலும் வலுப்படுத்தும் என எதிர்பார்க்கப்படுகிறது.
இதன் மூலம் சர்வதேச சந்தையில் கச்சா எண்ணெய் வர்த்தகத்தில் பெரும் மாற்றம் ஏற்பட்டுள்ளது.
