நாடாளுமன்ற உறுப்பினர்களுக்கு முறைகேடாக 13 கோடி ரூபா மருத்துவ உதவி: ஜனாதிபதி நிதியத்தில் பாரிய மோசடி அம்பலம்!
ஜனாதிபதி நிதியத்திலிருந்து கடந்த காலங்களில் 56 நாடாளுமன்ற மற்றும் மாகாண சபை உறுப்பினர்களுக்கு, சட்ட விதிகளை மீறி 130 மில்லியன் ரூபாவிற்கும் (13 கோடி) அதிகமான தொகை மருத்துவ உதவியாக வழங்கப்பட்டுள்ளமை தேசிய தணிக்கை அலுவலகத்தின் புதிய அறிக்கையில் அம்பலமாகியுள்ளது.
விதிமுறைகள் மீறப்பட்ட விதம் சாதாரண குடிமக்களுக்கு மருத்துவ உதவி வழங்கப்படும் போது பின்பற்றப்படும் அடிப்படை நடைமுறைகள் எவையும் இந்த அரசியல்வாதிகளின் விடயத்தில் கருத்தில் கொள்ளப்படவில்லை என தணிக்கை அறிக்கை சுட்டிக்காட்டுகிறது. குறிப்பாக:
விண்ணப்பப் படிவங்களை முறையாக சமர்ப்பிக்காமை.
மாதாந்திர வருமான வரம்புகளை மீறியுள்ளமை.
பிரதேச செயலாளரின் வருமான அறிக்கைகளைப் பெற்றுக்கொள்ளாமை.
நிதிச் சொத்துக்கள் மற்றும் மருத்துவ உதவிக்கான உச்ச வரம்புகளைப் புறக்கணித்தமை.
20 ஆண்டுகால முறைகேடு இந்த நிதி உதவிக் கொடுப்பனவுகள் கடந்த 2005 ஆம் ஆண்டு முதல் 2024 ஆம் ஆண்டு வரையிலான நீண்ட காலப்பகுதியில் வழங்கப்பட்டுள்ளதாக தெரிவிக்கப்படுகிறது. ஜனாதிபதி நிதியத்திலிருந்து கடன்களை வழங்குவதற்கான எவ்வித சட்ட ஏற்பாடுகளும் இல்லாத நிலையிலும், ஒரு நாடாளுமன்ற உறுப்பினருக்கு மாத்திரம் ஒரு கோடி ரூபாவிற்கும் அதிகமான தொகை மருத்துவ உதவியாக வழங்கப்பட்டுள்ளது. இந்தத் தொகை இதுவரை மீள வசூலிக்கப்படவில்லை என்பதும் குறிப்பிடத்தக்கது.
முன்னாள் பிரதமருக்கு வழங்கப்பட்ட சலுகை இந்த மோசடியில் முன்னாள் பிரதமர் ஒருவரின் பெயரும் அடிபட்டுள்ளது. அவருக்கு மருத்துவ உதவிகளுக்காக சட்ட விதிகளுக்குப் புறம்பாக சுமார் 3 கோடி ரூபா வழங்கப்பட்டுள்ளது. இதில் ஒரு கோடியே 37 இலட்சம் ரூபாவிற்கும் அதிகமான தொகை, பின்னர் மீளச் செலுத்தும் (Recovery basis) அடிப்படையில் வழங்கப்பட்ட போதிலும், அந்தத் தொகை இதுவரை ஜனாதிபதி நிதியத்திற்குத் திரும்பக் கிடைக்கவில்லை என தணிக்கை அறிக்கை கடுமையாகச் சாடியுள்ளது.
நாட்டின் பொதுச் சொத்தான ஜனாதிபதி நிதியம், தகுதியான பொதுமக்களுக்குச் சென்றடைவதற்குப் பதிலாக, அரசியல் செல்வாக்கைப் பயன்படுத்தி இவ்வாறு முறைகேடாகப் பயன்படுத்தப்பட்டுள்ளமை மக்கள் மத்தியில் பெரும் அதிருப்தியை ஏற்படுத்தியுள்ளது.
