தொல்பொருளியல் சட்டத் திருத்தம்

🏛️ தொல்பொருளியல் சட்டத் திருத்தம்: தேசிய மக்கள் சக்தி அரசு நடவடிக்கை – குழுக்களில் சிறுபான்மையினர் இணைப்பு!

தொல்பொருளியல் சட்டத்தில் சீர்திருத்தங்களை மேற்கொள்ள தேசிய மக்கள் சக்தி (NPP) தலைமையிலான அரசாங்கம் நடவடிக்கை எடுத்துள்ளதாகத் தகவல்கள் வெளியாகியுள்ளன. இதற்கு அமைய, சர்ச்சைக்குள்ளான ஆலோசனைக் குழுக்களில் சிறுபான்மை சமூகத்தினர் உள்வாங்கப்பட்டுள்ளனர்.

14 பேர் கொண்ட சீர்திருத்தக் குழு:
புத்தசாசன, சமய விவகார மற்றும் கலாசார அலுவல்கள் அமைச்சினால் இதற்காக 14 உறுப்பினர்களைக் கொண்ட தொல்பொருளியல் சட்ட சீர்திருத்தக் குழு நியமிக்கப்பட்டுள்ளது. இக்குழுவில் ஓய்வுபெற்ற கட்டிடக்கலைஞர் ரத்னவேலுப்பிள்ளை மயூரனாதன், பேராசிரியர் வீ. மகேஸ்வரன் உள்ளிட்ட சிறுபான்மை சமூக உறுப்பினர்கள் உள்வாங்கப்பட்டுள்ளனர்.

இந்தக் குழுவின் முதலாவது கூட்டம் அண்மையில் பத்தரமுல்லையிலுள்ள அமைச்சின் தேசிய மரபுரிமைகள் பிரிவில் இடம்பெற்றுள்ளது.

ஆலோசனைக் குழுவிலும் இணைவு:
முன்னதாக, நவம்பர் 1ஆம் திகதி வெளியிடப்பட்ட வர்த்தமானி அறிவித்தலூடாக நியமிக்கப்பட்ட தொல்பொருளியல் ஆலோசனைக் குழுவில் சிறுபான்மையினர் எவரும் உள்ளடக்கப்படவில்லை என்ற விமர்சனம் கடுமையாக முன்வைக்கப்பட்டது.

இந்தக் குற்றச்சாட்டினை நிவர்த்தி செய்யும் வகையில், அந்தக் குழுவின் உறுப்பினர்கள் எண்ணிக்கை 19இல் இருந்து 23 ஆக அதிகரிக்கப்பட்டுள்ளதுடன், அதிலும் சிறுபான்மை சமூகத்தவர்கள் உள்வாங்கப்பட்டுள்ளனர்.

ஏற்கனவே, 19 பேரைக் கொண்ட இந்தக் குழு தற்போது 23ஆக அதிகரிக்கப்பட்டுள்ளது. இதில் ஓய்வுபெற்ற பேராசிரியர் பீ.ஏ. ஹுசைன்மியா, ஓய்வுபெற்ற பேராசிரியர் வீ. மகேஸ்வரன் மற்றும் ஓய்வுபெற்ற கட்டிடக்கலைஞர் ரத்னவேலுப்பிள்ளை மயூரனாதன் ஆகியோர் சிறுபான்மை சமூகம் சார்பாக இக்குழுவின் உறுப்பினர்களாக உள்வாங்கப்பட்டுள்ளனர்.

ஜனாதிபதி அநுரகுமார திசாநாயக்க தலைமையில் கடந்த நவம்பர் 10ஆம் திகதி நடைபெற்ற அமைச்சரவைக் கூட்டத்திலேயே, மேற்படி இரண்டு குழுக்களிலும் சிறுபான்மை இனத்தவர்களை உள்வாங்குவது என்ற தீர்மானம் மேற்கொள்ளப்பட்டமை குறிப்பிடத்தக்கது.