தமிழ் வம்சாவளியைச் சேர்ந்த 10 வயது சிறுமி, உலகையே வியக்க வைக்கும் சதுரங்க சாதனை!
லண்டனில் வசிக்கும் தமிழ் வம்சாவளியைச் சேர்ந்த 10 வயது சிறுமி போதானா சிவானந்தன், சதுரங்க உலகில் புதிய சாதனை படைத்து அனைவரையும் ஆச்சரியத்தில் ஆழ்த்தியுள்ளார். சமீபத்தில் நடைபெற்ற 2025 பிரிட்டிஷ் சதுரங்க சாம்பியன்ஷிப் போட்டியில், இவர் 60 வயது கிராண்ட்மாஸ்டரான பீட்டர் வெல்ஸை வீழ்த்தி வரலாற்றுச் சாதனை படைத்தார்.
இதன் மூலம், கிராண்ட்மாஸ்டர் ஒருவரை தோற்கடித்த உலகின் இளம் வயது பெண் வீராங்கனை என்ற பெருமையை போதானா சிவானந்தன் பெற்றுள்ளார். இதற்கு முன், இந்த சாதனை அமெரிக்க வீராங்கனையான கரிஸா யிப் வசம் இருந்தது. அவர் 10 வயது, 11 மாதங்கள் மற்றும் 20 நாட்களில் இச்சாதனையை நிகழ்த்தினார். போதானா சிவானந்தன் 10 வயது, 5 மாதங்கள் மற்றும் 3 நாட்களில் இந்த சாதனையை முறியடித்துள்ளார்.
போதானா சிவானந்தனின் பெற்றோர் தமிழ்நாட்டின் திருச்சியைச் சேர்ந்தவர்கள். 2007-ல் அவரது குடும்பம் லண்டனுக்கு குடிபெயர்ந்தது. தனது 5 வயதில், கொவிட் காலத்தில் சதுரங்கம் விளையாடத் தொடங்கிய போதானா, குறுகிய காலத்திலேயே தனது திறமையால் அனைவரையும் வியப்பில் ஆழ்த்தினார்.
போதானா சிவானந்தன் ஏற்கனவே பல சாதனைகளை நிகழ்த்தியுள்ளார். கடந்த ஆண்டு, தனது 9 வயதில் இங்கிலாந்து நாட்டின் மகளிர் அணியில் இடம்பிடித்ததன் மூலம், எந்தவொரு விளையாட்டிலும் இங்கிலாந்து தேசிய அணிக்காகத் தேர்வு செய்யப்பட்ட மிக இளம் வயது வீராங்கனை என்ற பெருமையையும் அவர் பெற்றார்.
போதானாவின் இந்த சாதனைகள், தமிழ் சமூகத்திற்கும், உலகளாவிய சதுரங்க உலகிற்கும் பெருமை சேர்த்துள்ளன.
