3ஆவது திருத்தச் சட்டம்: தாமதத்துக்கு தமிழ் கட்சிகளின் இரட்டை நிலைப்பாடே காரணம் – விக்கிக்கு மனோ கணேசன் பதில்
13வது திருத்தச் சட்டத்தை அமுலாக்குவதில் ஏற்பட்டுள்ள தாமதத்திற்காக இந்திய அரசாங்கத்தை வெறுமனே குறை கூறுவது பொறுத்தமற்றது என நாடாளுமன்ற உறுப்பினரும், தமிழ் முற்போக்குக் கூட்டணியின் தலைவருமான மனோ கணேசன் தெரிவித்துள்ளார். குறித்த சட்டத்தை அமுல்படுத்துவதற்கான ஆர்வம் தமிழ் நாடாளுமன்றக் கட்சிகளிடமே போதுமான அளவில் இல்லை எனவும் அவர் சுட்டிக்காட்டியுள்ளார்.
மாகாண சபைகள் மற்றும் 13வது திருத்தச் சட்டத்தை அமுலாக்குவது தொடர்பில், “இந்தியா ஏன் கரிசனை காட்டவில்லை? பாரதத்தின் இயலாமையா? தமிழரின் மீது அக்கறையின்மையா?” என வடக்கு மாகாண சபை முன்னாள் முதலமைச்சர் சி.வி. விக்னேஸ்வரன் கேள்வி எழுப்பியுள்ளது பொருத்தமற்றது என எண்ணுவதாக பதில் தரும்போதே மனோ கணேசன் இதைக் குறிப்பிட்டுள்ளார்.
கட்சிகளின் ‘சமஷ்டி’ அச்சம்:
இலங்கைத் தமிழரசுக் கட்சி (ITAK), தமிழீழ விடுதலை இயக்கம் (TELO) போன்ற நாடாளுமன்றக் கட்சிகள், மாகாண சபை தேர்தல்கள் தேவை என உரக்கக் கோரினால், அது தமது சமஷ்டி (கூட்டாட்சி) நிலைப்பாட்டைக் கேள்விக்குள்ளாக்கி விடுமோ என அச்சப்படுவதாக மனோ கணேசன் குற்றம் சாட்டினார்.
“நாடாளுமன்றத்தில் அங்கம் வகிக்கும் தமிழ் தேசியக் கட்சிகள் மாகாண சபைகள் தொடர்பில், “கூச்சப்படும் இளம் பிள்ளையைப் போல” வாய் திறந்து குரல் எழுப்பத் தயங்குகின்றன.”
“இதன் காரணமாகவே, ‘தேர்தல் நடக்க வேண்டும். நடந்தால் நாங்களும் போட்டியிடுவோம்’ என அவர்கள் இரகசியமாக முணுமுணுக்கின்றனர். தமிழரசுக் கட்சிக்குள் இந்த விடயம் தொடர்பாகவே இரட்டை நிலைப்பாடு நிலவுகிறது,” என அவர் தெரிவித்தார்.
கஜேந்திரகுமாரின் நிலைப்பாடு:
தமிழ் தேசிய மக்கள் முன்னணித் தலைவர் கஜேந்திரகுமார் பொன்னம்பலம் 13வது திருத்தச் சட்டத்தை வெளிப்படையாக நிராகரித்தாலும், அவரும் மாகாண சபை தேர்தலில் போட்டியிடத் தயார் என்று அறிவித்துள்ளார்.
இந்தியா சலிப்படைந்தது:
13வது திருத்தச் சட்டமே தமிழர்களின் இறுதித் தீர்வு என இந்தியா ஒருபோதும் வலியுறுத்தவில்லை என்ற போதிலும், இலங்கை அரசியலமைப்பில் மாகாண சபையை உள்வாங்கிய சட்டமாக அது இருப்பதால், இந்தியா அதனை வலியுறுத்தியே வந்தது.
எனினும், “சம்பந்தப்பட்ட தமிழ் கட்சிகளே இது குறித்துப் போதுமான அக்கறை காட்டாதபோது, இந்தியத் தரப்பு தற்போது சலிப்படைந்துள்ளதாக நான் புரிந்து கொண்டுள்ளேன்,” என மனோ கணேசன் குறிப்பிட்டார்.
மக்கள் கருத்து:
அதேவேளை, “இருப்பதை இப்போதே பெற்றுக் கொண்டு, தம்மைத் திடப்படுத்திக் கொண்டு, அடுத்த கட்டத்தை நோக்கி நகர வேண்டும்,” என்ற பொதுவான கருத்து தமிழ் மக்கள் மத்தியில் வலுவாக நிலவுவதாகவும் அவர் தெரிவித்தார்.
13வது திருத்தம் மற்றும் மாகாண சபைகள் குறித்துச் சுரேஷ் பிரேமச்சந்திரன், வரதராஜ பெருமாள் போன்ற ஒரு சிலரே தெளிவாகவும் தைரியமாகவும் கருத்து தெரிவிக்கின்றனர். ஆனால் அவர்களுக்கு அரசியல் வலிமை போதுமானதாக இல்லை. எனவே, இவ்வாறான சூழ்நிலையில் இந்திய அரசாங்கத்தைக் குறைசொல்வது பொருத்தமற்றதாகும் என மனோ கணேசன் முடித்தார்.
