கேகாலை இளைஞன் கையெறி குண்டு, வாளுடன் யாழ்ப்பாணத்தில் கைது
யாழ்ப்பாணம், சண்டிலிப்பாய் வடக்குப் பகுதியில் திங்கட்கிழமை இடம்பெற்ற வன்முறைச் சம்பவம் தொடர்பாக, கேகாலை, அளகொலவத்தை பகுதியைச் சேர்ந்த 21 வயது இளைஞன் ஒருவன் கைது செய்யப்பட்டுள்ளான்.
முகமூடி அணிந்த நான்கு பேர் கொண்ட கும்பல் ஒன்று ஒரு வீட்டிற்குள் பலவந்தமாக நுழைந்து, வீட்டின் முன்னால் நிறுத்தப்பட்டிருந்த ஒரு முச்சக்கர வண்டியை தீ வைத்துக் கொளுத்தியதுடன், வீட்டிற்குள் வைக்கப்பட்டிருந்த ஒரு மோட்டார் சைக்கிளையும் திருடிச் சென்றுள்ளதாக பொலிஸார் தெரிவித்தனர்.
திருடப்பட்ட மோட்டார் சைக்கிள், சம்பவ இடத்தில் இருந்து சுமார் ஒரு கிலோமீட்டர் தொலைவில் உள்ள மாசியாப்பிட்டி சந்திக்கருகில் கைவிடப்பட்டு தீவைக்கப்பட்ட நிலையில் பின்னர் மீட்கப்பட்டது.
பாதிக்கப்பட்ட குடும்பத்தினர் அளித்த முறைப்பாட்டின் பேரில், மானிப்பாய் பொலிஸார் தாக்குதல் குறித்து விசாரணைகளை ஆரம்பித்தனர். விசாரணைகளின் பின்னர், நவாலி பகுதியில் உள்ள ஒரு வீட்டில் பதுங்கியிருந்த யாட்டியாந்தோட்டை பிரதேசத்தைச் சேர்ந்த சந்தேகநபரொருவரை பொலிஸார் கைது செய்தனர்.
கைது நடவடிக்கையின் போது, சந்தேகநபரிடமிருந்து ஒரு கையெறி குண்டு மற்றும் ஒரு வாள் என்பன கைப்பற்றப்பட்டன. குறித்த இளைஞன் மேலதிக விசாரணைகளுக்காக மானிப்பாய் பொலிஸ் நிலையத்தில் தடுத்து வைக்கப்பட்டுள்ளான்.
இந்த வன்முறைச் சம்பவத்துடன் தொடர்புடைய ஏனைய மூன்று சந்தேகநபர்களையும் பொலிஸார் அடையாளம் கண்டுள்ளதாகவும், அவர்களைக் கைது செய்வதற்கான நடவடிக்கைகள் எடுக்கப்பட்டு வருவதாகவும் பொலிஸார் மேலும் தெரிவித்தனர்.
