தீபாவளி பயண நெரிசலைச் சமாளிக்க மேலதிக பேருந்துகளும் ரயில்களும் சேவையில்!

தீபாவளி பயண நெரிசலைச் சமாளிக்க மேலதிக பேருந்துகளும் ரயில்களும் சேவையில்!

​தீபாவளிப் பண்டிகையை முன்னிட்டு, கிராமங்களுக்குச் செல்லும் மக்களின் வசதிக்காக விசேட போக்குவரத்துச் சேவைகள் ஆரம்பிக்கப்பட்டுள்ளன.

​இலங்கை போக்குவரத்துச் சபையின் (SLTB) பிரதிப் பொது முகாமையாளர் டி. எச். ஆர். டி. சந்திரசிறி அவர்கள் இது குறித்துக் கருத்துத் தெரிவிக்கையில்,

​கொழும்பு புறக்கோட்டை, போதிராஜா மாவத்தை பஸ் நிலையத்திலிருந்து இன்று (அக்டோபர் 18) ஹட்டன், பதுளை, நுவரெலியா, மாஸ்கெலியா, நானு ஓயா மற்றும் யாழ்ப்பாணம் ஆகிய இடங்களுக்கு 75 மேலதிக பேருந்துகள் சேவையில் ஈடுபடுத்தப்பட்டுள்ளன.

​அதே பகுதிகளுக்கு நாளை (அக்டோபர் 19) கொழும்பிலிருந்து 73 மேலதிக பேருந்துகள் சேவையில் ஈடுபடுத்தப்படும்.

​பஸ் சேவை 24 மணி நேரமும் செயல்படும்.

​அடுத்த செவ்வாய்க்கிழமை (அக்டோபர் 21) முதல் கொழும்புக்குத் திரும்பும் மக்களுக்குப் போக்குவரத்து வசதிகளை வழங்குமாறு இலங்கை போக்குவரத்துச் சபையின் 12 பிராந்திய அதிகாரிகளுக்கும் அறிவுறுத்தல்கள் வழங்கப்பட்டுள்ளன.

​தேசிய போக்குவரத்து ஆணைக்குழு வெளியிட்டுள்ள அறிக்கையில், தீபாவளிக்காக புறக்கோட்டையில் உள்ள மாகும்புர மற்றும் பஸ்தியன் மாவத்தையிலிருந்து விசேட பஸ் சேவைகள் இயக்கப்படும் என்று தெரிவிக்கப்பட்டுள்ளது.

​இதேவேளை, ரயில் சேவைகள் இன்றும் நாளையும் வழமை போல் இயங்கும் என்று ரயில்வே திணைக்களம் தெரிவித்துள்ளது.