ஊழியர்கள் உடன்படாத பட்சத்தில் வேறு வேலையைத் தேடலாம்

ஊழியர்கள் உடன்படாத பட்சத்தில் வேறு வேலையைத் தேடலாம் – அஞ்சல் ஊழியர்களுக்கு அரசாங்கம் எச்சரிக்கை

அஞ்சல் ஊழியர்கள் வேலைநிறுத்தப் போராட்டத்தைக் கைவிட்டு, பயோமெட்ரிக் வருகைப்பதிவு மற்றும் மேலதிக நேர கொடுப்பனவு தொடர்பான அரசாங்கத்தின் முடிவுகளுக்கு இணங்க வேண்டும் என அமைச்சரவைப் பேச்சாளர் நளின் ஜயதிஸ்ஸ தெரிவித்துள்ளார். ஊழியர்கள் உடன்படாத பட்சத்தில் வேறு வேலையைத் தேடலாம் என அவர் குறிப்பிட்டுள்ளார்.

அஞ்சல் தொழிற்சங்கங்கள் முன்வைத்த 19 கோரிக்கைகளில் 17 கோரிக்கைகள் ஏற்கனவே நிறைவேற்றப்பட்டுள்ளதாகவும், எஞ்சிய பயோமெட்ரிக் வருகைப்பதிவு மற்றும் மேலதிக நேரக் கொடுப்பனவு தொடர்பான கோரிக்கைகள் ஏற்றுக்கொள்ள முடியாதவை என்றும் அவர் கூறினார். இந்தப் பிரச்சினைகள் தொடர்பாக பல்வேறு அரசியல் கட்சிகளைச் சேர்ந்த குழுக்கள் எதிர்ப்புத் தெரிவித்து வருவதாகவும் அவர் சுட்டிக்காட்டினார்.

அஞ்சல் ஊழியர்கள் கடந்த ஞாயிற்றுக்கிழமை (17) முதல் நாடு தழுவிய வேலைநிறுத்தத்தில் ஈடுபட்டுள்ளனர். இதனால் அஞ்சல் சேவைகள் நாடு முழுவதும் பாதிக்கப்பட்டுள்ளன.

மேலதிக நேர கொடுப்பனவுகள் மற்றும் வருகைப்பதிவு குறித்து விரிவான தணிக்கை அறிக்கைகள் மோசடிகளைக் கண்டறிந்துள்ளன என அஞ்சல் மா அதிபர் ருவன் சத்குமார தெரிவித்துள்ளார். இதனால், பயோமெட்ரிக் வருகைப்பதிவு முறை அவசியமானது என்றும் அவர் சுட்டிக்காட்டினார்.

தற்போதைய சூழ்நிலைக்கு இன்னும் தீர்வு காணப்படவில்லை. அரசாங்கத்தின் இந்த எச்சரிக்கைக்கு தொழிற்சங்கங்கள் இன்னும் பதிலளிக்கவில்லை.