இஸ்ரேலில் இருந்து புறப்பட்ட விமானத்திற்கு வெடிகுண்டு மிரட்டல்!!

இஸ்ரேலில் இருந்து புறப்பட்ட விமானத்திற்கு வெடிகுண்டு மிரட்டல்!!

பல்கேரியாவில் அவசரமாகத் தரையிறக்கப்பட்ட ஏர்பஸ் ஏ-320!

இஸ்ரேலின் டெல் அவிவ் (Tel Aviv) நகரிலிருந்து ஒஸ்ரியாவின் வியன்னா (Vienne) நகரை நோக்கிப் புறப்பட்ட ‘ஒஸ்ரியன் ஏர்லைன்ஸ்’ (Austrian Airlines) பயணிகள் விமானத்தில் வெடிகுண்டு வைக்கப்பட்டிருப்பதாக வந்த மிரட்டலையடுத்து,

அந்த விமானம் பல்கேரியாவில் அவசரமாகத் தரையிறக்கப்பட்டது. ஞாயிற்றுக்கிழமை இரவு ருமேனிய வான்பரப்பை நெருங்கியபோது இந்த அச்சுறுத்தல் தகவல் விமானக் குழுவினருக்குக் கிடைத்ததால்,

அவர்கள் உடனடியாகப் பல்கேரியத் தலைநகர் சோபியாவில் (Sofia) விமானத்தைத் தரையிறக்க முடிவு செய்ததாகப் பல்கேரியப் போக்குவரத்து அமைச்சகம் தெரிவித்துள்ளது.

விமானம் அவசர நிலையைப் பிரகடனப்படுத்தும் ‘7700’ என்ற குறியீட்டை உமிழ்ந்ததையடுத்து, பாதுகாப்பு விதிமுறைகளுக்கு அமையப் பல்கேரிய

விமானப்படை உடனடியாகத் தனது ‘MiG-29’ ரகப் போர் விமானம் ஒன்றை அனுப்பிப் பயணிகள் விமானத்தைப் பாதுகாப்பாக வழிநடத்தியது. விமானம் சோபியாவில் தரையிறங்கிய சுமார் அரை மணி நேரத்திற்குள்,

அதிலிருந்த 51 பயணிகள் மற்றும் 6 பணியாளர்கள் என அனைவரும் பத்திரமாக வெளியேற்றப்பட்டனர். தற்போது அந்த ஏர்பஸ் ஏ-320 விமானத்தில் தீவிர வெடிகுண்டு சோதனை நடைபெற்று

வருவதாகவும், சோதனை முடிந்ததும் பயணிகள் விரைவாக மாற்று விமானங்கள் மூலம் அனுப்பி வைக்கப்படுவார்கள் எனவும் ஒஸ்ரியன் ஏர்லைன்ஸ் நிறுவனம் தெரிவித்துள்ளது.

இச்சம்பவம் குறித்து விசாரிக்கப் பல்கேரியப் போக்குவரத்து அமைச்சகம் அவசரக் குழு ஒன்றை அமைத்துள்ளது.

சமீபகாலமாக இஸ்ரேல் தொடர்புடைய மற்றும் ஐரோப்பியப் பகுதிகளில் விமானப் போக்குவரத்துப் பாதுகாப்பில் பல அசம்பாவிதங்கள் அரங்கேறி வருவது

குறிப்பிடத்தக்கது. கடந்த மாத இறுதியில், துபாயில் இருந்து டெல் அவிவ் சென்ற ‘பிளைதுபாய்’ (flydubai) விமானத்தில், துணை விமானி ஒருவர் பிரதான விமானியைத் தாக்கிவிட்டு விமானத்தை

வேண்டுமென்றே தரையில் மோதி விபத்துக்குள்ளாக்க முயன்றதும், விமானி மற்றும் பயணிகளின் போராட்டத்தால் அந்தச் சதி முறியடிக்கப்பட்டதும் நினைவுகூரத்தக்கது.

அதேபோல, கடந்த வாரம் கிரீஸ் நாட்டின் கோர்பு (Corfou) தீவிலிருந்து ஜெர்மனியின் நியூரம்பெர்க் (Nuremberg) நகருக்குச் சென்ற பயணிகள் விமானம் தவறுதலாகக் கடத்தல் எச்சரிக்கையை அனுப்பியதால்,

குரோஷியா மற்றும் ஜெர்மனி ஆகிய நாடுகள் தங்களது போர் விமானங்களை அவசரமாகக் களமிறக்கியிருந்தமையும் இங்கு சுட்டிக்காட்டத்தக்கது.