பிரான்ஸ் பாடசாலையில் துப்பாக்கிச் சூடு! அதிபர், ஆசிரியர் காயம் – 14 வயது மாணவர் கைது!
பிரான்ஸின் தெற்குப் பகுதியில் உள்ள ஓபான் (Aubagne) நகரில் அமைந்துள்ள ஜோசப் லக்கனால் (Joseph-Lakanal) கல்லூரியில்
இன்று, ஒக்டோபர் 12ஆம் திகதி, திங்கட்கிழமை காலை இடம்பெற்ற துப்பாக்கிச் சூட்டுச் சம்பவம் பெரும் பரபரப்பை ஏற்படுத்தியுள்ளது.
காலை சுமார் 10 மணியளவில் இடம்பெற்ற இந்தச் சம்பவத்தில், குறித்த பாடசாலையின் அதிபரும் 37 வயதுடைய பெண் ஆசிரியர் ஒருவரும் துப்பாக்கிச் சூட்டுக்கு இலக்காகிக் காயமடைந்துள்ளனர்.
வேட்டைக்குப் பயன்படுத்தப்படும் துப்பாக்கியைக் கொண்டு இந்தத் தாக்குதல் நடத்தப்பட்டதாக ஆரம்பகட்ட விசாரணைத் தகவல்கள் தெரிவிக்கின்றன.
இந்தச் சம்பவத்துடன் தொடர்புடையவர் எனச் சந்தேகிக்கப்படும் அதே கல்லூரியில் கல்வி பயிலும் 14 வயது மாணவர் ஒருவர் பொலிஸாரால் கைது செய்யப்பட்டுள்ளார்.
பாடசாலையின் கல்வி ஆலோசகர் மற்றும் பணியாளர்கள் தலையிட்டு மாணவரைக் கட்டுப்படுத்தியதைத் தொடர்ந்து,
பொலிஸாரிடம் அவர் ஒப்படைக்கப்பட்டதாகத் தகவல்கள் தெரிவிக்கின்றன.
காயமடைந்த அதிபரும் ஆசிரியரும் உடனடியாக மீட்புப் பணியாளர்களால் அழைத்துச் செல்லப்பட்டு மருத்துவ உதவி வழங்கப்பட்டுள்ளது.
இருவருக்கும் காயங்கள் ஏற்பட்டுள்ளபோதிலும், அவர்களது உயிருக்கு ஆபத்து இல்லை என அதிகாரிகள் தெரிவித்துள்ளனர்.
மேலும் ஒருவர் இலேசான காயத்துக்கு உள்ளாகியுள்ளதாகவும் தெரிவிக்கப்படுகிறது. அதிர்ஷ்டவசமாக, இந்தச் சம்பவத்தில் மாணவர்கள் எவரும் காயமடையவில்லை.
சம்பவத்தைத் தொடர்ந்து பாடசாலை வளாகத்தில் பாதுகாப்பு நடவடிக்கைகள் முன்னெடுக்கப்பட்டதுடன்,
மாணவர்களின் மனநலப் பாதிப்புகளைக் கருத்தில் கொண்டு உளவியல் ஆலோசனை வழங்குவதற்கான ஏற்பாடுகளும் மேற்கொள்ளப்பட்டுள்ளன.
இந்தச் சம்பவத்திற்கான காரணம் இதுவரை உறுதிப்படுத்தப்படவில்லை. பிரான்ஸின் பல பாடசாலைகளில் அண்மைக்காலமாக இடம்பெற்று வரும் மாணவர் போராட்டங்களுக்கும் இந்தத் துப்பாக்கிச் சூட்டுக்கும் தொடர்பு இருப்பதாக இதுவரை எந்த ஆதாரமும் வெளியாகவில்லை என அதிகாரிகள் தெரிவித்துள்ளனர்.
சம்பவம் தொடர்பாக மேலதிக விசாரணைகள் முன்னெடுக்கப்பட்டு வருகின்றன. பிரான்ஸ் உள்துறை அமைச்சர் லோரான் நூனேஸ் மற்றும் தேசியக் கல்வி அமைச்சர் எட்வார் கெஃப்ரே உள்ளிட்ட அமைச்சர்கள் சம்பவ இடத்துக்குச் செல்லவுள்ளதாகவும் அறிவிக்கப்பட்டுள்ளது.
பாடசாலைகள் மாணவர்கள் கல்வி கற்கும் பாதுகாப்பான இடங்களாக இருக்க வேண்டிய நிலையில், இத்தகைய வன்முறைச் சம்பவங்கள் பெற்றோர், ஆசிரியர்கள் மற்றும் கல்விச் சமூகத்தினர் மத்தியில் பெரும் கவலையை ஏற்படுத்தியுள்ளன.
