பாரிஸில் நள்ளிரவு பயங்கரம்: போலீஸ் சோதனையில் இருந்து தப்பிக்க முயன்ற கார் பேருந்துடன் மோதி விபத்து – 6 பேர் காயம்!
(பாரிஸ், ஏப்ரல் 4, 2026)
பாரிஸின் பரபரப்பான தொடருந்து நிலையங்களான வடக்கு தொடருந்து நிலையம் (Gare du Nord) மற்றும் கிழக்கு தொடருந்து நிலையம் (Gare de l’Est) ஆகியவற்றுக்கு இடைப்பட்ட பகுதியில், இன்று அதிகாலை நிகழ்ந்த கார் விபத்தில் 6 பேர் காயமடைந்தனர்.
இன்று அதிகாலை சுமார் 1 மணியளவில், பாரிஸின் 10-வது வட்டாரத்தில் உள்ள ‘ரூ து போபோர்க் சென்ட்-மார்ட்டன்’ (Rue du Faubourg Saint-Martin) சாலையில், காப்பீடு செய்யப்படாத கார் ஒன்று செல்வதைக் காவல்துறையினர் கவனித்தனர். அந்தக் காரை நிறுத்தும்படி காவல்துறையினர் சைகை காட்டினர்.
ஆனால், காரை ஓட்டி வந்த நபர் காவல்துறையிடம் சிக்காமல் இருக்க, காரை அதிவேகமாகச் செலுத்தித் தப்பிக்க முயன்றார். அப்போது, ‘ரூ து சாட்டோ-லாண்டன்’ (Rue du Château-Landon) சாலையில் வந்து கொண்டிருந்த ஆர்.ஏ.டி.பி (RATP) பொதுப் போக்குவரத்துப் பேருந்து மீது அந்தக் கார் பலமாக மோதியது.இந்தக் கடுமையான மோதலில் கார் ஓட்டுநர் உட்பட மொத்தம் 6 பேர் காயமடைந்தனர்:
பேருந்தில் பயணம் செய்த போது காயமடைந்த 5 பேரில் .நான்கு பேருக்குக் கழுத்து மற்றும் உடல் உறுப்புகளில் வலி ஏற்பட்டதால், அவர்கள் உடனடியாக மருத்துவ மணிக்கு அனுப்பப்பட்டனர்
பேருந்தை ஓட்டுனருக்கு லேசான காயங்கள் ஏற்பட்டன, ஆனால் அவர் மருத்துவமனையில் அனுமதிக்கப்பட வேண்டிய தேவை எழவில்லை.
விபத்தை ஏற்படுத்திய கார் ஓட்டுநர் “மிகவும் கவலைக்கிடமான” நிலையில் மீட்கப்பட்டார். உடலில் பல இடங்களில் பலத்த காயமடைந்த (Polytraumatisé) அவர், தற்போது ‘Pitié-Salpêtrière மருத்துவமனையில் தீவிர சிகிச்சைப் பிரிவில் அனுமதிக்கப்பட்டுள்ளார்.
இந்தச் சம்பவம் குறித்துப் பாரிஸ் அரசு வழக்கறிஞர் அலுவலகம் வழக்குப் பதிவு செய்து விசாரணையைத் தொடங்கியுள்ளது. கார் ஓட்டுநர் மீது கீழ்க்கண்ட இரண்டு முக்கியக் குற்றச்சாட்டுகள் சுமத்தப்பட்டுள்ளன:
ஓட்டுநர் உரிமம் இன்றி வாகனம் ஓட்டியது.
போக்குவரத்துச் சிக்னலில் சிவப்பு விளக்கை மீறிச் சென்றது.
காயமடைந்தவர்களுக்கு மூன்று மாதங்களுக்கும் மேலான சிகிச்சை தேவைப்படலாம் என்பதால், இது ஒரு தீவிரமான சாலை விபத்து வழக்காக விசாரிக்கப்பட்டு வருகிறது.
பாரிஸில் சமீபகாலமாக இது போன்ற “சோதனையில் இருந்து தப்பிக்கும்” (Refus d’obtempérer) முயற்சிகள் அதிகரித்து வருவது மக்களிடையே கவலையை ஏற்படுத்தியுள்ளது.
