பதவி விலகினாா் மோர்கன் மெக்ஸ்வீனி – பிரித்தானிய அரசியலில் பரபரப்பு
பிரித்தானிய பிரதமர் கீர் ஸ்டார்மரின் (Keir Starmer) தலைமை அதிகாரி (Chief of Staff) மோர்கன் மெக்ஸ்வீனி (Morgan McSweeney), நேற்று (பிப்ரவரி 8, 2026, ஞாயிற்றுக்கிழமை பதவி விலகியுள்ளாா்.
பிரித்தானிய அரசாங்கத்தின் மிகவும் செல்வாக்கு மிக்க அதிகாரியாகக் கருதப்பட்ட மெக்ஸ்வீனி, ஒரு சர்ச்சைக்குரிய விவகாரம் காரணமாகத் தனது பதவியைத் துறந்துள்ளார்.
அமெரிக்காவுக்கான பிரித்தானிய தூதராக பீட்டர் மண்டெல்சனை (Peter Mandelson) நியமிக்க மெக்ஸ்வீனி வழங்கிய ஆலோசனையே இந்த சர்ச்சைக்குக் காரணம்.
பீட்டர் மண்டெல்சனுக்கும், பாலியல் குற்றவாளியான ஜெப்ரி எப்ஸ்டீனுக்கும் (Jeffrey Epstein) இடையிலான உறவு குறித்துத் தகவல்கள் வெளியானதைத் தொடர்ந்து, மண்டெல்சன் கடந்த செப்டம்பரில் பதவி நீக்கம் செய்யப்பட்டார்.
தகுதியற்ற ஒருவரைத் தூதராக நியமிக்கப் பிரதமருக்குத் தவறான ஆலோசனை வழங்கியதற்காகத் தான் “முழுப் பொறுப்பு” ஏற்பதாகக் கூறி மெக்ஸ்வீனி பதவி விலகியுள்ளார்.
மெக்ஸ்வீனி தனது பதவிவிலகல் கடிதத்தில்
“பீட்டர் மண்டெல்சனை நியமிக்கும் முடிவு தவறானது. இது நமது கட்சி, நாடு மற்றும் அரசியல் மீதான நம்பிக்கையைச் சிதைத்துள்ளது. இதற்கான ஆலோசனையை வழங்கியவன் என்ற ரீதியில், விலகிச் செல்வதே கௌரவமான செயலாகும்.” எனக் குறிப்பிட்டுள்ளாா்.
மெக்ஸ்வீனிக்கு பதிலாக வித்யா அழகேசன் (Vidhya Alakeson) மற்றும் ஜில் கத்பெர்ட்சன் (Jill Cuthbertson) ஆகியோர் தற்காலிகத் தலைமை அதிகாரிகளாகப் பொறுப்பேற்றுள்ளனர்.
பிரதமர் கீர் ஸ்டார்மருக்கு இது ஒரு பெரும் பின்னடைவாகக் கருதப்படுகிறது, ஏனெனில் மெக்ஸ்வீனி ஸ்டார்மரின் “வலது கரம்” மற்றும் தேர்தல் வெற்றிகளின் மூளையாகச் செயல்பட்டவர்.
மெக்ஸ்வீனியைப் பதவி விலக அனுமதித்தது பிரதமரை இன்னும் பலவீனமாகக்காட்டுவதாகச் சில தொழிலாளர் கட்சி (Labour) எம்.பி.க்கள் கருதுகின்றனர். “தவறான முடிவை எடுத்தது பிரதமர்தான், ஆனால் ஆலோசகர் பலிகடா ஆக்கப்பட்டுள்ளார்” என்ற விமர்சனம் எழுந்துள்ளது.
2024 தேர்தலில் தொழிலாளர் கட்சி பெற்ற பிரம்மாண்ட வெற்றிக்கு மெக்ஸ்வீனியே காரணம். அவர் இல்லாதது கட்சியின் எதிர்காலத் தேர்தல் வியூகங்களுக்குப் பின்னடைவாக அமையலாம்.
