நாடுகடத்தப்படும் 5 வயது சிறுவன் : நீதிமன்றத்தின் முக்கிய தீர்ப்பு!
அமெரிக்காவின் மினசோட்டா (Minnesota) மாகாணத்தில் உள்ள கொலம்பியா ஹைட்ஸ் (Columbia Heights) பகுதியில் ஒரு தந்தையையும் அவரது 5 வயது மகனையும் அவர்களது தாய்நாட்டிற்குத் திருப்பி அனுப்ப (Deportation) குடிவரவுத் துறை அதிகாரிகள் முடிவு செய்திருந்தனர்.
இந்த நாடுகடத்தல் நடவடிக்கைக்கு எதிராகத் தொடரப்பட்ட வழக்கில், சிறுவனின் எதிர்காலம் மற்றும் தற்போதைய பாதுகாப்புச் சூழலைக் கருத்தில் கொண்டு தடை விதிக்கக் கோரப்பட்டது.
குழந்தைகளின் அடிப்படை உரிமைகள் மீறப்படுவதாக மனித உரிமை அமைப்புகள் இந்த வழக்கிற்கு ஆதரவாகக் குரல் கொடுத்து வருகின்றன.
ஜனவரி 20, 2026 அன்று, 5 வயது சிறுவன் லியாம் (Liam) தனது தந்தையுடன் முன்பள்ளியில் (Preschool) இருந்து வீடு திரும்பியபோது, அவர்களது வீட்டு வாசலில் வைத்தே ICE (Immigration and Customs Enforcement) அதிகாரிகளால் பிடிக்கப்பட்டனர்.
பாடசாலை கண்காணிப்பாளர் ஸேனா ஸ்டென்விக் (Zena Stenvik) கூறுகையில், அதிகாரிகள் அந்தச் சிறுவனை ஓடிக்கொண்டிருந்த காரில் இருந்து இறக்கி, அவனது வீட்டின் கதவைத் தட்டச் சொன்னார்கள். வீட்டிற்குள் வேறு யாராவது இருக்கிறார்களா என்பதைச் சரிபார்க்க அந்த 5 வயதுச் சிறுவனை அதிகாரிகள் ஒரு ‘தூண்டிலாக’ பயன்படுத்தியதாக அவர் குற்றம் சாட்டியுள்ளார்.
அருகில் இருந்த மற்றொரு பெரியவர் குழந்தையைப் பொறுப்பேற்க முன்வந்தும், அதிகாரிகள் அதற்கு மறுத்து குழந்தையையும் தந்தையையும் அழைத்துச் சென்றதாக அதிகாரிகள் தெரிவித்தனர்.
எனினும் அமெரிக்க உள்நாட்டு பாதுகாப்புத் துறை (DHS) இந்தக் குற்றச்சாட்டை “முற்றிலும் பொய்” என மறுத்துள்ளது.
அதிகாரிகளின் கூற்றுப்படி, சிறுவனின் தந்தை அட்ரியன் (Adrian) அதிகாரிகளைக் கண்டதும் ஓட முயன்றார் என்றும், அப்போது தனது குழந்தையை காரிலேயே விட்டுச் சென்றார் என்றும் தெரிவித்துள்ளனர்.
குழந்தையின் பாதுகாப்பிற்காகவே ஒரு அதிகாரி சிறுவனுடன் இருந்ததாகவும், தந்தை சட்டவிரோதமாக அமெரிக்காவிற்குள் நுழைந்தவர் என்பதால் அவர் கைது செய்யப்பட்டார் என்றும் DHS விளக்கம் அளித்துள்ளது.
தற்போது சிறுவனும் தந்தையும் டெக்சாஸில் உள்ள ஒரு தடுப்பு முகாமில் (Detention Center) வைக்கப்பட்டுள்ளனர்.
இந்தச் சம்பவத்திற்கு எதிர்ப்புத் தெரிவித்துத் தொடரப்பட்ட வழக்கை விசாரித்த நீதிபதி, அவர்களை இப்போதைக்கு நாடுகடத்த (Deportation) இடைக்காலத் தடை விதித்துள்ளார்.
இந்தச் சம்பவம் மினசோட்டா முழுவதும் பெரும் போராட்டங்களை வெடிக்கச் செய்துள்ளதுடன், பாடசாலை மாணவர்கள் மற்றும் புலம்பெயர்ந்த குடும்பங்கள் மத்தியில் பெரும் அச்சத்தை ஏற்படுத்தியுள்ளது.
இந்தச் சிறுவன் ஸ்பைடர் மேன் (Spider-Man) பையுடனும், ஒரு முயல் காது வைத்த தொப்பியுடனும் அதிகாரிகளால் அழைத்துச் செல்லப்பட்ட புகைப்படம் இணையத்தில் வைரலாகி, அமெரிக்காவில் பெரும் விவாதத்தை ஏற்படுத்தியது குறிப்பிடத்தக்கது.
