அனர்த்தத்தால் பாதிக்கப்பட்ட பகுதிகளில் உள்ள வீடுகளுக்கு மின் விநியோகம் ஒருபோதும் துண்டிக்கப்படாது என்று இலங்கை மின்சார சபையின் (CEB) பொது முகாமையாளர் ஷெர்லி குமார உறுதியளித்துள்ளார்.
கட்டணம் பற்றி கவலை இல்லை:
பயனர்கள் மின் கட்டணங்களைச் செலுத்தாத காரணத்தால், பாதிக்கப்பட்ட பகுதிகளில் மின் இணைப்பைத் துண்டிக்கும் நடவடிக்கையை CEB மேற்கொள்ளாது என்று அவர் வலியுறுத்தினார்.
அதற்குப் பதிலாக, நிலுவையில் உள்ள கட்டணங்கள் அனைத்தும் எதிர்காலக் கட்டண சுழற்சிகளுடன் சேர்க்கப்படும் என்றும், இந்த நேரத்தில் எந்த வடிவத்திலும் மின் துண்டிப்பு நடைபெறாது என்றும் அவர் தெரிவித்தார்.
மீற்றர் வாசிப்பு சிக்கல்கள்:
பாதிக்கப்பட்ட பல பகுதிகளில் மீற்றர் வாசிப்புகளை எடுக்கவோ அல்லது மின்கட்டணப் பட்டியல்களை விநியோகிக்கவோ முடியாத நிலைமை ஏற்பட்டுள்ளது என்றும் ஷெர்லி குமார விளக்கினார்.
எனவே, இந்தச் சவாலான காலகட்டத்தில் தடையில்லா மின்சார விநியோகத்தை உறுதி செய்த பின்னர், நிலுவை மின்கட்டணப் பட்டியல்கள் அடுத்த மாதங்களில் நுகர்வோருக்கு வழங்கப்படும்.
மேலும், சீரற்ற காலநிலை மற்றும் அதன் விளைவாக ஏற்பட்ட அனர்த்த நிலை காரணமாக மின்சார சபைக்கு ஏற்பட்டுள்ள இழப்புகள் தற்போது கணக்கிடப்பட்டு வருவதாகவும் அவர் குறிப்பிட்டார்.
