ஸ்ட்ராஸ்பர்க் (Strasbourg) சந்தையின் வரலாறு
காலத்தை வென்ற கலாச்சார அடையாளம்
பிரான்ஸின் கிழக்கு எல்லையில், அல்சாஸ் (Alsace) பிராந்தியத்தில் அமைந்துள்ள ஸ்ட்ராஸ்பர்க் நகரின் கிறிஸ்துமஸ் சந்தை வெறும் வணிகத் திருவிழா அல்ல; அது 450 ஆண்டுகளுக்கும் மேலான வரலாற்றைத் தாங்கி நிற்கும் ஒரு கலாச்சார அடையாளம். பிரான்ஸின் மிகப் பழமையான இந்தச் சந்தையின் கதை, மத மாற்றங்களோடும், மக்களின் நம்பிக்கையோடும் பின்னிப் பிணைந்தது.
1. புனித நிக்கோலஸின் காலம் (12-ம் நூற்றாண்டு)
இதன் வேர்களைத் தேடிச் சென்றால், நாம் மத்திய காலத்திற்குச் செல்ல வேண்டும். 12-ம் நூற்றாண்டுகளில், ஸ்ட்ராஸ்பர்க்கில் கிறிஸ்துமஸ் சந்தை என்ற ஒன்று இல்லை. மாறாக, “செயிண்ட் நிக்கோலஸ் சந்தை” (Klausenmärik) டிசம்பர் 6-ம் திகதியை ஒட்டி நடைபெற்று வந்தது. புனித நிக்கோலஸ் குழந்தகளுக்குப் பரிசுகளை வழங்கும் இரக்ககுணமிக்கவராகக் கருதப்பட்டார். அன்று குழந்தைகளுக்குத் தேவையான மெழுகுவர்த்திகள், இனிப்புப் பண்டங்கள் மற்றும் ‘ஜிஞ்சர் பிரட்’ (Gingerbread) போன்றவை விற்கப்பட்டன.
2. 1570: அந்தத் திருப்புமுனை
ஸ்ட்ராஸ்பர்க் சந்தையின் வரலாற்றில் 1570-ம் ஆண்டு மிக முக்கியமானது. அது ஐரோப்பாவில் மதச் சீர்திருத்தங்கள் (Reformation) வீறுகொண்டு எழுந்த காலம். அல்சாஸ் பகுதி புராட்டஸ்டன்ட் (Protestant) மதப்பிரிவைத் தழுவியது.
கத்தோலிக்க முறைப்படி புனிதர்களை வழிபடுவதை புராட்டஸ்டன்ட் பிரிவு எதிர்த்தது. எனவே, ஸ்ட்ராஸ்பர்க் கதீட்ரலின் மதபோதகரான ஜொஹானஸ் ஃபிளின்னர் (Johannes Flinner) என்பவர் ஒரு புரட்சிகரமான மாற்றத்தை முன்மொழிந்தார்.
“குழந்தைகளுக்குப் பரிசளிப்பது புனித நிக்கோலஸ் அல்ல; அது பாலகன் இயேசுவே (Christ Child). எனவே, இந்தச் சந்தை நிக்கோலஸுக்காக இல்லாமல், இயேசுவின் பிறப்பைக் கொண்டாடும் வகையில் அமைய வேண்டும்” என்று அவர் வாதிட்டார்.
இதன் விளைவாக, சந்தையின் பெயர் “கிறிஸ்ட் கிண்டெல்ஸ் மெரிக்” (Christkindelsmärik) அதாவது “பாலகன் இயேசுவின் சந்தை” என மாற்றப்பட்டது. அதுவரை டிசம்பர் 6-ல் நடந்த சந்தை, கிறிஸ்துமஸ் தினத்திற்கு (டிசம்பர் 24) முந்தைய வாரங்களுக்கு மாற்றப்பட்டது. இப்படித்தான் நாம் இன்று காணும் கிறிஸ்துமஸ் சந்தை 1570-ல் அதிகாரப்பூர்வமாகப் பிறந்தது.
3. இடம் மாறிய சந்தை
இந்தச் சந்தை நிலையாக ஒரே இடத்தில் இருந்ததில்லை. நூற்றாண்டுகளாக நகரின் பல இடங்களுக்கு இது இடம்பெயர்ந்துள்ளது:
தொடக்கத்தில் கதீட்ரல் தேவாலயத்தின் (Notre Dame Cathedral) முன்புறத்தில் நடைபெற்றது.
19-ம் நூற்றாண்டில், இது ‘பிளாஸ் கிலேபர்’ (Place Kléber) மற்றும் ‘பிளாஸ் பிரோக்லி’ (Place Broglie) பகுதிகளுக்கு விரிவடைந்தது.
இன்று, “கிராண்ட் இல்” (Grande Île) எனப்படும் நகரின் மையப்பகுதி முழுவதும் இந்தச் சந்தை பரந்து விரிந்து, நகரை ஒரு மாயாஜாலத் தீவாக மாற்றுகிறது.
4. வானுயர்ந்த கிறிஸ்துமஸ் மரம் (Le Grand Sapin)
ஸ்ட்ராஸ்பர்க் சந்தையின் ஆன்மா என்றால் அது ‘பிளாஸ் கிலேபர்’ (Place Kléber) சதுக்கத்தில் நிறுவப்படும் பிரம்மாண்டமான கிறிஸ்துமஸ் மரம்தான்.
1605-ம் ஆண்டிலேயே, ஸ்ட்ராஸ்பர்க்கில் ஃபிர் (Fir) மரங்களை வீடுகளுக்குள் வைத்து, காகித ரோஜாக்கள், ஆப்பிள்கள் மற்றும் சர்க்கரை மிட்டாய்களால் அலங்கரிக்கும் வழக்கம் இருந்ததற்கான வரலாற்றுச் சான்றுகள் உள்ளன.
இன்று, சுமார் 30 மீட்டர் உயரமுள்ள இயற்கையான மரம் அருகிலுள்ள காடுகளிலிருந்து வெட்டி வரப்பட்டு, ஆயிரக்கணக்கான விளக்குகளால் அலங்கரிக்கப்படுகிறது. இதுவே உலகின் மிகப் பழமையான கிறிஸ்துமஸ் மரப் பாரம்பரியங்களில் ஒன்றாகும்.
5. போர்களை வென்ற பாரம்பரியம்
இந்தச் சந்தை அமைதியாக வளர்ந்துவிடவில்லை. பிரெஞ்சுப் புரட்சி, 1870-ம் ஆண்டுப் போர், மற்றும் இரண்டு உலகப் போர்கள் எனப் பல நெருக்கடிகளைக் கடந்து வந்துள்ளது. போர் காலங்களில் சந்தை தடைபட்டாலும், மக்களின் மனதிலிருந்து அது நீங்கவில்லை. 1990-களுக்குப் பிறகே, இது உலகளாவிய சுற்றுலா ஈர்ப்பாக மாறியது.
📜 சுருக்கமாகச் சொன்னால்…
புனித நிக்கோலஸிடம் இருந்து தொடங்கி, பாலகன் இயேசுவின் பெயரால் மாறி, இன்று மதங்களைக் கடந்து மனிதநேயத்தையும் மகிழ்ச்சியையும் பகிரும் ஒரு உலகளாவிய திருவிழாவாக ஸ்ட்ராஸ்பர்க் சந்தை உயர்ந்து நிற்கிறது.
இன்று (நவம்பர் 26) திறக்கப்பட்டுள்ள இந்தச் சந்தையில் நீங்கள் வாங்கும் ஒவ்வொரு பொருளிலும், ஒளிர்ந்து கொண்டிருக்கும் ஒவ்வொரு விளக்கிலும் 450 ஆண்டுகால வரலாறு புன்னகைத்துக் கொண்டிருக்கிறது.
