ரணில் விக்கிரமசிங்க மீதான வழக்கு ஜனவரி 2026 க்கு ஒத்திவைப்பு
முன்னாள் ஜனாதிபதி ரணில் விக்கிரமசிங்க மீதான வழக்கு விசாரணை 2026 ஆம் ஆண்டு ஜனவரி 28 ஆம் திகதிக்கு ஒத்திவைக்கப்பட்டுள்ளது.
பொதுச் சொத்துச் சட்டத்தின் கீழ் தாக்கல் செய்யப்பட்ட இந்த வழக்கு, இன்று (அக்டோபர் 29) கோட்டை நீதவான் இசுரு நெத்குமார முன்னிலையில் விசாரணைக்கு எடுத்துக்கொள்ளப்பட்ட போதே இந்தத் தீர்மானம் எடுக்கப்பட்டது.
ஜனாதிபதியாக இருந்த காலத்தில், 2023 செப்டம்பர் 22 மற்றும் 23 ஆகிய திகதிகளில் ரூபா 16.6 மில்லியன் அரசாங்க நிதியை முறைகேடாகப் பயன்படுத்தினார் என்ற குற்றச்சாட்டு தொடர்பான இந்த விடயம் தொடர்பில் வாக்குமூலம் அளிப்பதற்காக குற்றப் புலனாய்வுத் திணைக்களத்தில் (CID) முன்னிலையான போது, விக்கிரமசிங்க கடந்த 2025 ஆகஸ்ட் 23 ஆம் திகதி கைது செய்யப்பட்டார்.
ஆகஸ்ட் 26 ஆம் திகதி வழக்கு மீண்டும் விசாரணைக்கு எடுத்துக்கொள்ளப்பட்ட போது, விக்கிரமசிங்கவின் சார்பில் ஆஜரான ஜனாதிபதி சட்டத்தரணி அனுஜ பிரேமரத்ன, முன்னாள் ஜனாதிபதியின் சுகாதார நிலைமையைக் காரணம் காட்டி பிணை விண்ணப்பத்தை சமர்ப்பித்தார்.
சமர்ப்பிக்கப்பட்ட விடயங்களைக் கருத்திற்கொண்ட நீதவான், சந்தேக நபரின் ஆரோக்கியத்தை கருதி அவருக்குப் பிணை வழங்கினார்.
இந்த வழக்கில் அடுத்த கட்ட விசாரணைக்காக 2026 ஆம் ஆண்டு ஜனவரி மாதம் வரை கால அவகாசம் வழங்கப்பட்டுள்ளது.
