அர்க்கியா இஸ்ரேல் ஏர்லைன்ஸ்: டெல் அவிவிலிருந்து கொழும்புக்கு நேரடி விமான சேவை ஆரம்பம்
இஸ்ரேலுக்கான இலங்கைத் தூதுவர் நிமல் பண்டாரவின் கூற்றுப்படி, அர்க்கியா இஸ்ரேல் ஏர்லைன்ஸ் (Arkia Israel Airlines) நிறுவனம் டெல் அவிவிலிருந்து கொழும்புக்கு புதிய நேரடி விமான சேவைகளை ஆரம்பித்துள்ளது. இந்தச் சேவை இன்று செப்டெம்பர் 24ஆம் திகதி ஆரம்பிக்கப்பட்டுள்ளது.
தூதுவரின் அறிக்கையின்படி, அர்க்கியா ஏர்லைன்ஸ் விமானம் IZ 639 டெல் அவிவ் விமான நிலையத்திலிருந்து ஒவ்வொரு செவ்வாய்க்கிழமையும் இரவு 18:30 மணிக்கு புறப்பட்டு, புதன்கிழமை காலை 06:15 மணிக்கு கொழும்பு கட்டுநாயக்க விமான நிலையத்தை வந்தடையும்.
மீண்டும் அங்கிருந்து விமானம் IZ 640, புதன்கிழமை இரவு 22:30 மணிக்கு கொழும்பிலிருந்து புறப்பட்டு, வியாழக்கிழமை காலை 05:35 மணிக்கு டெல் அவிவ் சென்றடையும்.
ஓமான் மற்றும் மாலைதீவுகளின் வான்பரப்பில் இஸ்ரேலிய விமானங்களுக்கு தடை விதிக்கப்பட்டுள்ளதால், இந்த விமானம் சீஷெல்ஸ் வழியாக இயக்கப்படும். இதனால், கொழும்பை வந்தடைய அண்ணளவாக 9 மணி நேரம் 15 நிமிடங்கள் ஆகும்.
முக்கியமாக இஸ்ரேலிய சுற்றுலாப் பயணிகளை இலக்காகக் கொண்ட இந்த விமானச் சேவை, வாரத்திற்கு ஒருமுறை இயக்கப்படும்.
