அரசாங்கத்தின் கல்வி சீர்திருத்தங்களை இலங்கை ஆசிரியர் சங்கம் நிராகரிப்பு!
அரசாங்கத்தால் முன்மொழியப்பட்டுள்ள கல்வி சீர்திருத்தங்களுக்கு இலங்கை ஆசிரியர் சங்கம் கடுமையாக எதிர்ப்பு தெரிவித்துள்ளது. போதிய ஆலோசனை இல்லாதது, கொள்கைகளில் உள்ள முரண்பாடுகள் மற்றும் மாணவர்கள் மீது ஏற்படக்கூடிய எதிர்மறையான தாக்கங்கள் ஆகியவற்றை அவர்கள் காரணமாகக் குறிப்பிட்டுள்ளனர்.
இலங்கை ஆசிரியர் சங்கத்தின் செயலாளர் ஜோசப் ஸ்டாலின் இந்த சீர்திருத்தங்கள் “முற்றிலும் எதிர்க்கப்பட வேண்டியவை” என்று தெரிவித்தார். இவை அவசரமாகத் தயாரிக்கப்பட்டவை என்றும், முக்கிய பங்குதாரர்களின் கருத்துக்கள் உள்வாங்கப்படவில்லை என்றும் அவர் குறிப்பிட்டார்.
“இந்த சீர்திருத்தங்களில் புதிதாக எதுவுமில்லை – இவை ஏற்கனவே விவாதிக்கப்பட்டவைதான். கல்வி அமைச்சர் வகுப்பறை மாணவர்களின் எண்ணிக்கையை 30 ஆகக் குறைப்பது பற்றிப் பேசுகிறார். ஆனால் அவர் இந்த ஆண்டு வெளியிட்ட சுற்றறிக்கை ஒரு வகுப்பிற்கு 40 மாணவர்கள் இருக்க வேண்டும் என்று கூறுகிறது. இது எப்படிச் சாத்தியம்?” என்று ஸ்டாலின் கேள்வி எழுப்பினார், கொள்கை முரண்பாடுகளை சுட்டிக்காட்டினார்.
சீர்திருத்தங்கள் தேசிய கல்வி நிறுவனம் (National Institute of Education) மூலம் அல்லாமல், தேசிய கல்வி ஆணையத்தால் (National Education Commission) உருவாக்கப்பட வேண்டும் என்றும், தேசிய கல்வி நிறுவனத்திற்கு மூலோபாய பார்வை இல்லை என்றும் அவர் விமர்சித்தார். “இந்த சீர்திருத்தங்களை உருவாக்கிய குழு தேசிய கல்வி நிறுவனத்தில் உள்ளது. அவர்களுக்கு எந்த தொலைநோக்குப் பார்வையும் இல்லை,” என்று அவர் வலியுறுத்தினார்.
“ஜனாதிபதி பாடசாலை இடைவிலகல் குறித்துப் பேசினார், ஆனால் இந்த சீர்திருத்தங்கள் அந்த எண்ணிக்கையை மேலும் அதிகரிக்கும்” என்றும் ஸ்டாலின் மேலும் கூறினார்.
அத்துடன், பாடசாலை நேரத்தை நீட்டிக்கும் திட்டங்களுக்கும் ஸ்டாலின் எதிர்ப்பு தெரிவித்தார். உரிய ஆலோசனை இல்லாமல் ஆசிரியர்கள் பிற்பகல் 2 மணி வரை கடமையில் இருக்குமாறு அழுத்தம் கொடுக்கப்படுவதாகவும் அவர் குறிப்பிட்டார். “இந்த தன்னிச்சையான முடிவுகளை நாங்கள் முழுமையாக எதிர்க்கிறோம்,” என்று அவர் முடித்தார்.
