குருநாகல் வர்த்தகர் கொலை: இருவர் கைது

குருநாகல் வர்த்தகர் கொலை: இருவர் கைது; 6 மில்லியனுக்கும் அதிகமான பணம், நகை மீட்பு

கடந்த வாரம் மஹாவ காட்டுப் பகுதியில் வாகனமொன்றினுள் எரிந்த நிலையில் சடலமாக மீட்கப்பட்ட குருநாகல் வர்த்தகரின் கொலை தொடர்பில் இரு சந்தேகநபர்கள் கைது செய்யப்பட்டுள்ளனர்.

கொலை செய்யப்பட்டவர் 49 வயதுடைய ஹோட்டல் துறையைச் சேர்ந்த வர்த்தகர் ஆவார். இவர் குருநாகல், மில்லாவ பகுதியைச் சேர்ந்தவர் என அடையாளம் காணப்பட்டுள்ளார்.

சம்பவம் தொடர்பில் விசாரிக்க பல காவல்துறை குழுக்கள் நியமிக்கப்பட்டன. காவல்துறையின் விசாரணைகளில் அவர் கொலை செய்யப்பட்டமை உறுதிப்படுத்தப்பட்டது.

இதுவரை நடத்தப்பட்ட விசாரணைகளின்படி, வர்த்தகர் தனது வாகனத்தில் பயணித்துக் கொண்டிருந்தபோது கடத்தப்பட்டு பின்னர் கொலை செய்யப்பட்டுள்ளார். சந்தேகநபர்கள் உயிரிழந்தவரிடம் இருந்த பணம், தங்க நகைகள் மற்றும் கையடக்கத் தொலைபேசியுடன் தப்பிச் சென்றுள்ளனர்.

கடந்த ஞாயிற்றுக்கிழமை, மஹாவ மற்றும் தொரட்டியாவ பகுதிகளில் வைத்து இரண்டு சந்தேகநபர்களையும் காவல்துறை கைது செய்தது. இவர்களிடம் இருந்து ரூபா 1.4 மில்லியனுக்கும் அதிகமான பணமும், ரூபா 4.8 மில்லியனுக்கும் அதிகமான பெறுமதியான தங்க நகைகளும் மீட்கப்பட்டுள்ளன.

கைது செய்யப்பட்ட சந்தேகநபர்கள் 19 மற்றும் 27 வயதுடையவர்கள் ஆவர். இவர்கள் மஹாவ மற்றும் பிலேஸ்ஸ பகுதிகளைச் சேர்ந்தவர்கள் என தெரியவந்துள்ளது. மஹாவ காவல்துறை மேலதிக விசாரணைகளை மேற்கொண்டு வருகிறது.