அரசாங்கம் துப்பாக்கி தந்தால் எனக்கு பயிற்சி இல்லாமலே துப்பாக்கியை கையாள முடியும்..!
பாதுகாப்பு நோக்கங்களுக்காக கைத்துப்பாக்கிகளை வழங்குமாறு கோரி 20க்கும் மேற்பட்ட எதிர்க்கட்சி நாடாளுமன்ற உறுப்பினர்கள் நாடாளுமன்ற செயலாளர் நாயகத்திற்கு கடிதங்களை சமர்ப்பித்துள்ளனர்.
எனினும் பாதுகாப்புக்காக துப்பாக்கி கோரவில்லை . அரசாங்கம் துப்பாக்கி தந்தால் எனக்கு பயிற்சி இல்லாமலே துப்பாக்கியை கையாள முடியும் பாராளுமன்ற உறுப்பினர் சிறீதரன் தெரிவித்துள்ளார்.கிளிநொச்சியில் ஊடகவியலளார்களிடையே கருத்து தெரிவிக்கையில் சிறீதரன் இதனை தெரிவித்துள்ளார்.
வெலிகம பிரதேச சபைத் தலைவர் லசந்த விக்ரமசேகரவின் கொலை, ஐக்கிய மக்கள் சக்தியின் நாடாளுமன்ற உறுப்பினர் ஜகத் விதானவின் உயிருக்கு அச்சுறுத்தல் விடுக்கப்பட்டுள்ளதாக நாடாளுமன்றத்தில் வெளியிடப்பட்ட அறிக்கை உள்ளிட்ட பல சம்பவங்களை அடிப்படையாகக் கொண்டு, எதிர்க்கட்சித் தலைவர் உட்பட எதிர்க்கட்சி உறுப்பினர்கள் கடந்த சில நாட்களாக பாதுகாப்பு கோரி வருகின்றனர்.
இது தொடர்பான சிறப்பு கலந்துரையாடல் நேற்று நாடாளுமன்ற வளாகத்தில் சபாநாயகர் கலாநிதி ஜகத் விக்ரமரத்ன மற்றும் பொலிஸ்மா அதிபர் சட்டத்தரணி பிரியந்த வீரசூரிய ஆகியோரின் தலைமையில் நடைபெற்றது.
எதிர்க்கட்சி நாடாளுமன்ற உறுப்பினர்கள் அனைவரும் முதலில் பாதுகாப்பு வழங்கப்பட வேண்டும் என்றும், அப்போதுதான் அவர்கள் தங்கள் அரசியல் நடவடிக்கைகளை எந்தவித இடையூறும் இல்லாமல் பாதுகாப்பான சூழலில் மேற்கொள்ள முடியும் என்றும் தெரிவித்தனர்.
அச்சுறுத்தல் மதிப்பீட்டு அறிக்கையைப் பெற்று, மேலும் நடவடிக்கை எடுக்க வேண்டும் என்றும் அவர்கள் கோரிக்கை விடுத்துள்ளனர்.
இது தொடர்பாக தனது கருத்தைத் தெரிவித்த சபாநாயகர், பாதுகாப்பு கோரி நாடாளுமன்ற உறுப்பினர்கள் செய்யும் அனைத்து கோரிக்கைகள் தொடர்பாகவும் தேவையான நடவடிக்கைகளை எடுக்குமாறு பொலிஸ்மா அதிபருக்கு ஏற்கனவே அறிவிக்கப்பட்டுள்ளதாகக் கூறினார்.
நாடாளுமன்ற உறுப்பினர்களின் பாதுகாப்பு தொடர்பாக அரசாங்கம் கொள்கை ரீதியான முடிவை எடுத்திருந்தாலும், அதையும் மீறி, தொடர்புடைய கோரிக்கைகள் தொடர்பாக நடவடிக்கை எடுத்துள்ளதாகவும், அதன்படி, சில நாடாளுமன்ற உறுப்பினர்களுக்கு பாதுகாப்பு வழங்க ஏற்கனவே நடவடிக்கை எடுக்கப்பட்டுள்ளதாக சபாநாயகர் சுட்டிக்காட்டியுள்ளார்.
அதன்படி, பாதுகாப்பு கோரிய எதிர்க்கட்சி நாடாளுமன்ற உறுப்பினர்கள் தொடர்பான புலனாய்வு அறிக்கைகள் மற்றும் பொதுவான அச்சுறுத்தல் மதிப்பீட்டு அறிக்கைகளைக் கோர சபாநாயகரும் பொலிஸ்மா அதிபரும் முடிவு செய்தனர்.
தொடர்புடைய அறிக்கைகளில் வெளிப்படுத்தப்படும் தகவல்களின் அடிப்படையில், தேவைப்பட்டால், ஒவ்வொரு நாடாளுமன்ற உறுப்பினர்களுக்கும் பாதுகாப்பு வழங்க நடவடிக்கை எடுக்கப்படும்.
நேற்று நடைபெற்ற கலந்துரையாடலின் போது, பாதுகாப்பு கோரும் சில எதிர்க்கட்சி நாடாளுமன்ற உறுப்பினர்களுக்கு அவர்களது சொந்தக் கட்சி உறுப்பினர்களிடமிருந்தே அச்சுறுத்தல்கள் விடுக்கப்பட்டுள்ளதாக தெரியவந்தது.
