சம்பத் மனம்பேரி சரணடைய தயார்: நீதிமன்றம் காவல்துறைக்கு உத்தரவு
மத்திய மாகாணத்தில் அண்மையில் மேற்கொள்ளப்பட்ட சோதனைகள் தொடர்பாக, ஸ்ரீலங்கா பொதுஜன பெரமுன (SLPP) உள்ளூராட்சி மன்ற முன்னாள் வேட்பாளர் சம்பத் மனம்பேரி, நீதவான் நீதிமன்றத்தில் சரணடையத் தயார் என அவரது சட்டத்தரணிகள் இன்று (15) மேன்முறையீட்டு நீதிமன்றத்திற்கு தெரிவித்தனர்.
நீதியரசர்களான ரோஹந்த அபேசூரிய மற்றும் பிரியந்த பெர்னாண்டோ ஆகியோர் அடங்கிய அமர்வு முன்னிலையில் மனம்பேரியின் சட்டத்தரணிகள் தாக்கல் செய்த எழுத்தாணை மனு மீதான விசாரணையின்போது இந்த அறிவிப்பு வெளியிடப்பட்டது.
மத்திய மாகாணத்தில் கிறிஸ்டல் மெத்தம்பெட்டமைன் (“ஐஸ்”) உற்பத்திக்கு பயன்படுத்தப்படும் இரசாயனப் பொருட்கள் அடங்கிய இரண்டு கொள்கலன்கள் கண்டுபிடிக்கப்பட்ட சம்பவம் தொடர்பாக காவல்துறையினர் தற்போது மனம்பேரியை கைது செய்ய முயன்று வருவதாக மனுதாரரின் சட்டத்தரணி நீதிமன்றத்தில் தெரிவித்தார்.
மனம்பேரியின் சகோதரர் பியல் மனம்பேரி ஏற்கனவே கைது செய்யப்பட்டு விளக்கமறியலில் வைக்கப்பட்டுள்ளதாகவும், அவர்களின் 78 வயதுடைய தந்தை பிணையில் விடுவிக்கப்பட்டுள்ளதாகவும் சட்டத்தரணி மேலும் தெரிவித்தார்.
பியல் மனம்பேரி காவலில் இருந்தபோது கடுமையான உடல் ரீதியான துன்புறுத்தலுக்கு உள்ளாக்கப்பட்டதாகவும் குற்றம் சாட்டப்பட்டது.
சம்பத் மனம்பேரி விசாரணைகளுக்கு முழுமையாக ஒத்துழைக்கவும், உரிய நீதவான் நீதிமன்றத்தில் சரணடையவும் தயாராக இருப்பதாக சட்டத்தரணி வலியுறுத்தினார். இருப்பினும், கைது செய்யப்பட்ட பின்னர் அவரும் இதேபோன்ற துன்புறுத்தலுக்கு ஆளாக நேரிடும் என்ற அச்சமும் நிலவுவதாக தெரிவித்தார்.
தனது கட்சிக்காரர் அதிகாரிகளிடம் அனைத்து தொடர்புடைய தகவல்களையும் வெளியிடத் தயாராக இருப்பதாக சட்டத்தரணி நீதிமன்றத்திற்கு உறுதியளித்தார்.
சமர்ப்பிப்புகளைக் கருத்தில் கொண்ட மேன்முறையீட்டு நீதிமன்றம், விசாரணையின் போது சம்பத் மனம்பேரியின் பாதுகாப்பை உறுதி செய்யத் தேவையான அனைத்து நடவடிக்கைகளையும் எடுக்குமாறு காவல்துறை மா அதிபருக்கு உத்தரவிட்டது.
மனுதாரரின் பாதுகாப்பிற்கு உத்தரவாதம் அளிக்குமாறு தமது கட்டுப்பாட்டின் கீழ் உள்ள விசாரணை அதிகாரிகளுக்கு அறிவுறுத்துமாறும் நீதிமன்றம் காவல்துறை மா அதிபருக்கு உத்தரவிட்டது.
மனு மீதான அடுத்த விசாரணை ஒக்டோபர் 16ஆம் திகதிக்கு ஒத்திவைக்கப்பட்டுள்ளது.
