நடந்துவரும் எந்தவொரு நீதிமன்ற நடவடிக்கையிலும் அரசாங்கம் தலையிடவில்லை எனவும், அனைத்து நிறுவனங்களுக்கும் சுயாதீனமாக விசாரணைகளை மேற்கொள்ள இடம் வழங்கப்பட்டுள்ளதாகவும் சுகாதார மற்றும் ஊடகத்துறை அமைச்சரும் அமைச்சரவைப் பேச்சாளருமான நலிந்த ஜயதிஸ்ஸ தெரிவித்துள்ளார்.
முன்னாள் ஜனாதிபதி ரணில் விக்கிரமசிங்கவின் கைது குறித்து ஒரு யூடியூபர் தெரிவித்த கருத்துக்கள் தொடர்பாக ஊடகவியலாளர்கள் எழுப்பிய கேள்விகளுக்கு பதிலளிக்கும் போதே அவர் இவ்வாறு தெரிவித்தார்.
“சம்பந்தப்பட்ட நிறுவனங்களுக்கு தேவையான வசதிகளை வழங்குவது மட்டுமே அரசாங்கத்தின் பொறுப்பாகும். அது நிதி மோசடியாக இருந்தாலும், குற்றமாக இருந்தாலும் அல்லது ஊழலாக இருந்தாலும், விசாரணைகள் சுதந்திரமாக தலையீடு இல்லாமல் நடத்தப்படுகின்றன.
இந்த வழக்கையும், அந்தஸ்து பாராமல் அனைவருக்கும் சட்டம் சமமாகப் பொருந்தும் என்பதற்கு உதாரணமாகக் காணலாம்,” என ஜயதிஸ்ஸ கூறினார்.
மேலும் கருத்து தெரிவித்த அவர், ஊடகவியலாளர் விக்டர் ஐவனும் இதற்கு முன்னர் ஒரு நீதிமன்றத் தீர்ப்பு குறித்து முன்கூட்டியே கருத்து தெரிவித்த ஒரு சந்தர்ப்பத்தை மேற்கோள் காட்டி, இவ்வாறான முன்னறிவிப்புகள் ஏற்கனவே செய்யப்பட்டுள்ளதாக குறிப்பிட்டார்.
“சில வழக்குகள் எவ்வாறு செல்கின்றன என்பதைப் பொறுத்து, எவரும் கணிப்புகளைச் செய்யலாம். சிலர் பிணை வழங்கப்படும் என்று நினைக்கலாம், சிலர் அது நடக்காது என்று நினைக்கலாம். இவை யூகங்கள் போன்றவை – சில சமயங்களில் அவை சரியாக மாறும், சில சமயங்களில் தவறாக மாறும்.
ஆனால் இத்தகைய கணிப்புகள் செல்வாக்குச் செலுத்தப்படுவதாக யாராவது கூறினால், அது நீதிமன்ற அவமதிப்புக்கு சமமானதாகும்,” என்றும் அமைச்சர் மேலும் கூறினார்
