தேயிலைத் தோட்டத் தொழிலாளர்களின் சம்பள உயர்வு

தேயிலைத் தோட்டத் தொழிலாளர்களின் சம்பள உயர்வு: அரசாங்கம் மற்றும் தோட்ட நிர்வாகங்களுக்கு இடையே பேச்சுவார்த்தை

தேயிலைத் தோட்டத் தொழிலாளர்களின் தினசரி ஊதியத்தை 1,700 ரூபாயாக உயர்த்த, தோட்ட நிர்வாகங்களுடன் ஒரு உடன்பாடு எட்ட முயற்சிப்பதாகப் பெருந்தோட்ட மற்றும் சமுதாய உள்கட்டமைப்பு அமைச்சு தெரிவித்துள்ளது. இந்தப் பேச்சுவார்த்தைகள் தோல்வியடைந்தால், ஜனாதிபதியின் தலையீட்டைக் கோருவோம் என்றும் அமைச்சு கூறியுள்ளது.

பெருந்தோட்ட மற்றும் சமுதாய உள்கட்டமைப்பு துணை அமைச்சர் சுந்தரலிங்கம் பிரதீப் கருத்துத் தெரிவிக்கையில், தோட்ட நிறுவனங்கள், தோட்ட உரிமையாளர்கள் சங்கங்கள், மற்றும் தொழிலாளர் அமைச்சு ஆகியவற்றுடன் தொழிலாளர்களின் சம்பள உயர்வு குறித்து தற்போது பேச்சுவார்த்தைகள் நடைபெற்று வருகின்றன.

“தற்போது, தோட்டத் தொழிலாளர்கள் ஒரு நாளைக்கு 1,350 ரூபாய் சம்பாதிக்கின்றனர். இதை விரைவில் 1,700 ரூபாயாக உயர்த்த அரசாங்கம் நம்புகிறது. தற்போது நாங்கள் முதலாளிகளுடன் விவாதித்து ஒரு உடன்பாட்டை எட்ட முயற்சிக்கிறோம். பேச்சுவார்த்தைகள் தோல்வியுற்றால், நாங்கள் ஜனாதிபதியின் தலையீட்டைக் கோரி அவர்களின் ஊதியத்தை உயர்த்த வேண்டியிருக்கும்” என்று அவர் கூறினார்.

பெருந்தோட்டத் துறை ஊழியர்களின் சம்பளப் பிரச்சினை நீண்டகாலப் பிரச்சினையாக இருந்து வருகிறது. கடந்த காலங்களில் சம்பள உயர்வுக்கான கோரிக்கைகள் எழுந்தபோது, பெரும்பாலான முதலாளிகள் அதிகரித்த செலவுகள் மற்றும் செயல்பாட்டுச் சவால்கள் குறித்து கவலைகளை வெளிப்படுத்தினர். அதேசமயம், தொழிலாளர்கள் மற்றும் தொழிற்சங்கங்கள் தங்கள் வாழ்க்கைத் தரத்தை மேம்படுத்த சிறந்த ஊதியம் மற்றும் நன்மைகளைத் தொடர்ந்து கோரி வருகின்றனர்.

Voice of the Plantation People (VOPP) அமைப்பின் நிறைவேற்றுப் பணிப்பாளர் அந்தோனி இயேசுதாசன் உறுதியான திட்டம் இல்லாமல் அரசாங்கம் வாக்குறுதிகளை அளிப்பது ஏற்றுக்கொள்ள முடியாதது என்று கூறினார். திட்டமிடல் இல்லாததாலேயே தொழிலாளர்களின் ஊதியப் பிரச்சினைக்குத் தீர்வு காண்பது அரசாங்கத்திற்கு சவாலாக இருப்பதாகவும் அவர் வலியுறுத்தினார்.

“முதலில் தோட்ட நிறுவனங்களுடன் பேச்சுவார்த்தை நடத்தாமல் இந்த முடிவுகள் எடுக்கப்படுவதால், வாக்குறுதிகளை அளிப்பதே பிரச்சினைக்குரியது” என்று அவர் கூறினார்.

முன்னாள் ஜனாதிபதி ரணில் விக்கிரமசிங்கவும் இதேபோன்ற வாக்குறுதிகளை அளித்து, தோட்ட நிறுவனங்களுடன் முன்கூட்டியே தொடர்பு கொள்ளாததால், அவற்றை நிறைவேற்றத் தவறிவிட்டார் என்றும் அவர் கூறினார். வாழ்க்கைச் செலவுக்கு ஏற்ப சம்பளத்தை உயர்த்த தோட்ட நிறுவனங்களை அரசாங்கம் கட்டாயப்படுத்த வேண்டும் அல்லது ஊதிய உயர்வை உறுதி செய்ய அரச நிதியை ஒதுக்க வேண்டும் என்று இயேசுதாசன் வலியுறுத்தினார்.

இந்த ஆண்டு (2025) வரவுசெலவுத் திட்ட உரையின் போது, ஜனாதிபதி அநுர குமார திசாநாயக்க, தோட்டத் தொழிலாளர்களின் தினசரி ஊதியத்தை 1,700 ரூபாயாக உயர்த்த அரசாங்கம் தலையிடும் என்று அறிவித்தார். இருப்பினும், இயேசுதாசனின் கூற்றுப்படி, கடந்த ஆண்டு (2024) தினசரி ஊதியத்தை 1,350 ரூபாயாக உயர்த்த எடுத்த முடிவிலிருந்து தொழிலாளர்களுக்கு இதுவரை எந்த உயர்வும் கிடைக்கவில்லை.