இலங்கையில் $8 மில்லியன் மெத்தை தொழிற்சாலையை மூட சிங்கப்பூர் நிறுவனம் அச்சுறுத்தல்: BOI மீது குற்றச்சாட்டு!
இலங்கையில் ஃபோம் மெத்தை (Foam Mattress )உற்பத்தி தொழிற்சாலைக்காக 8 மில்லியன் அமெரிக்க டாலர் முதலீடு செய்திருந்த சிங்கப்பூர் நிறுவனம் ஒன்று, தமது செயல்பாடுகளை நிறுத்தப்போவதாக பரிசீலித்து வருகிறது. இலங்கையின் முதலீட்டுச் சபை (BOI) தமது நடவடிக்கைகளுக்குத் தடையாக இருப்பதாக அந்நிறுவனம் குற்றம் சாட்டுகிறது.
ஹானர் குளோபல் இண்டஸ்ட்ரீஸ் (Honour Global Industries) நிறுவனத்தின் பிரதிநிதிகள் ஊடகங்களுக்குத் தெரிவிக்கையில், 2023 ஆம் ஆண்டில் இலங்கையில் நுரை மெத்தை உற்பத்தி ஆலையை அமைப்பதற்கு $8 மில்லியன் முதலீட்டுடன் அனுமதி கோரியதாகத் தெரிவித்தனர். ஆண்டுக்கு சுமார் 2.5 மில்லியன் மெத்தைகளை இலங்கையில் உற்பத்தி செய்து பல்வேறு நாடுகளுக்கு ஏற்றுமதி செய்ய அனுமதி கோரப்பட்டதாகவும் அவர்கள் குறிப்பிட்டனர்.
இருப்பினும், 2024 மார்ச் மாதத்தில் தேவையான ஒப்புதலைப் பெற்ற சிறிது காலத்திற்குப் பிறகு, அமெரிக்காவிற்கான ஏற்றுமதி ஆண்டுக்கு 50,000 மெத்தைகளாகக் கட்டுப்படுத்தப்படும் என்று BOI எழுத்துப்பூர்வமாக அறிவித்ததாக பிரதிநிதிகள் தெரிவித்தனர்.
“இவ்வளவு குறைந்த எண்ணிக்கையிலான மெத்தைகளுக்கு ஒரு தொழிற்சாலையை எங்களால் இயக்க முடியாது,” என்று ஒரு பிரதிநிதி கூறினார். BOI மற்றும் நாணய சபை(Monetary Board) இரண்டும் கடந்த ஆறு மாதங்களாக இந்த விவகாரத்தை இழுத்தடித்து வருவதாகவும் அவர் மேலும் தெரிவித்தார். இந்த சூழ்நிலையால் கிட்டத்தட்ட 500 ஊழியர்கள் தங்கள் வேலைகளை இழக்கும் அபாயத்தில் உள்ளனர்.
கடந்த ஆறு மாதங்களாக தொழிற்சாலையில் உற்பத்தி நிறுத்தப்பட்டுள்ளதாகவும், இதனால் நிறுவனத்திற்கு மாதத்திற்கு $300,000 அமெரிக்க டொலர் நட்டம் ஏற்படுவதாகவும் அவர் மேலும் தெரிவித்தார்.
செயல்பாடுகளைத் தொடரவும் ஏற்றுமதியை மேற்கொள்ளவும் தேவையான வழிகாட்டுதல்களை வழங்குமாறு இந்த அதிகாரிகளிடம் மீண்டும் மீண்டும் கோரியுள்ளதாகவும், அது சாத்தியமில்லை என்றால், செயல்பாடுகளை மூடுவதற்கான சட்டப்பூர்வ வழிமுறைகளை வழங்குமாறு கேட்டுள்ளதாகவும் அவர் கூறினார்.
மற்றொரு பிரதிநிதி BOI மற்றும் நாணய சபை நியாயமற்ற கோரிக்கைகளை வைத்து முதலீட்டாளர்களை விரட்டுவதாகவும், மக்களை தேவையற்ற தொந்தரவுகளுக்கு ஆளாக்குவதாகவும் குற்றம் சாட்டினார். மேலும் ஒரு நிறுவன பிரதிநிதி ஊடகங்களிடம் பேசுகையில், தொழிற்சாலையின் செயல்பாடுகளைத் தொடர ஜனாதிபதி அலுவலகம் சம்பந்தப்பட்ட பரிந்துரைகளை அனுப்பிய போதிலும், BOI இந்த விஷயத்தில் கவனம் செலுத்த மறுப்பதாகத் தெரிவித்தார்.
