குறைந்த வருமானம் கொண்ட குடும்பங்களுக்காக நடைமுறைப்படுத்தப்பட்டு வரும் ‘அஸ்வெசும’ நலன்புரி கொடுப்பனவு திட்டத்தின் கீழ், தகுதியானவர்களை அடையாளம் காணும் முதற்கட்டத் தகவல் புதுப்பிப்பு நடவடிக்கைகள் எதிர்வரும் டிசம்பர் 31 ஆம் திகதியுடன் நிறைவடையவுள்ளன.
பட்டியலில் மாற்றங்கள்: தற்போது இத்திட்டத்தின் கீழ் சலுகைகளைப் பெற்று வருபவர்கள் மற்றும் இதுவரை விண்ணப்பித்தும் சலுகை கிடைக்காதவர்கள் என அனைவரது தகவல்களும் மீளாய்வு செய்யப்படவுள்ளன.
இதற்கமைய, தகுதியான புதிய பயனாளர்கள் உள்வாங்கப்படுவதற்கும், தகுதியற்றவர்கள் நீக்கப்படுவதற்கும் வாய்ப்புகள் உள்ளதாக நலன்புரி நன்மைகள் சபை தெரிவித்துள்ளது.
கால அவகாசம் நீடிப்பு: வருடாந்த தகவல் புதுப்பிப்பு பணிகளுக்காக ஏற்கனவே இம்மாதம் 10 ஆம் திகதி வரை வழங்கப்பட்டிருந்த கால அவகாசம், தற்போது டிசம்பர் 31 ஆம் திகதி வரை நீடிக்கப்பட்டுள்ளது. பயனாளர்கள் இந்த இறுதிச் சந்தர்ப்பத்தைப் பயன்படுத்தி தங்களது தகவல்களை உறுதிப்படுத்திக் கொள்ளுமாறு கேட்டுக்கொள்ளப்பட்டுள்ளனர்.
இந்தத் தகவல் புதுப்பிப்பு நடவடிக்கைகள் நிறைவடைந்ததும், திருத்தப்பட்ட புதிய பயனாளர் பட்டியல் உத்தியோகபூர்வமாக வெளியிடப்படும் என எதிர்பார்க்கப்படுகிறது.
