எதிர்வரும் பண்டிகைக் காலத்தில் சந்தையில் தட்டுப்பாடு ஏற்படுவதைத் தடுப்பதற்காக உளுந்து இறக்குமதிக்கு விதிக்கப்பட்டிருந்த தற்காலிகத் தடையை நீக்குவதற்கு அமைச்சரவை அங்கீகாரம் வழங்கியுள்ளது.
அரசாங்கத்தின் கூற்றுப்படி, இலங்கையின் வருடாந்த உளுந்து தேவை சுமார் 20,000 மெட்ரிக் டன் ஆகும்.
ஆனால் அறுவடை ஒரு குறிப்பிட்ட காலப்பகுதியில் மட்டுமே சந்தையை அடைவதால், ஒவ்வொரு ஆண்டும் ஏப்ரல் மற்றும் டிசம்பர் பண்டிகைக் காலங்களில் சந்தையில் உளுந்து பற்றாக்குறை ஏற்படுகின்றது.
எனவே, எதிர்வரும் பண்டிகைக் காலங்களில் சந்தையில் உளுந்து தட்டுப்பாடு ஏற்படுவதைத் தடுக்கவும், சிறுதானியத்தின் விலை உயர்வைக் கட்டுப்படுத்தவும் நடவடிக்கை எடுக்க வேண்டும்.
அந்தவகையில், உளுந்து இறக்குமதிக்கான தற்காலிக தடையை நீக்குவதற்கு விவசாய மற்றும் பெருந்தோட்ட கைத்தொழில் அமைச்சரினால் முன்வைக்கப்பட்ட யோசனைக்கு அமைச்சரவை அங்கீகாரம் வழங்கியுள்ளது.
அரச வர்த்தக (பொது) கூட்டுத்தாபனம், தேசிய உணவு ஊக்குவிப்பு சபை மற்றும் இலங்கையின் ஹடபிமா அதிகாரசபை ஆகியவற்றின் ஊடாக மாத்திரம் 2000 மெற்றிக் தொன் உளுந்து இறக்குமதி செய்ய அனுமதி வழங்கப்பட்டுள்ளது.
